Wir Fridreich von gotes genaden ertzbischolf ze Salzburch, legat des stu/ols ze Rom, veriehen offenbar an disem brief und tu/on chunt allen den, di in sehent oder horent lesen, daß wir unsern getriwn Chunraten und Hertniden, Chunrats von Chuchel, dem got genad, su/enen und Margreten ir muter durch unser und unsers gotshouses durft mit rat und mit gu/otem willen unser liben in got tumprobst Chunrats und techent Vlrichs und unsers capitels ze Salzburch haben geben ze leibgeding zu ir drier leib di veste ze Goling und dar zu zwelf pfunt geltes Salzburger pfenning ouz unserm Ha/ellein und di urbor, di her nach sind benant, umb dreuhundert pfunt Salzburger pfenning, der si uns gar und ga/entzlichen habent ouz gerichtt. Daz ist daz urbar, daz wir in dar zu haben geben: ein gu/ot datz Atnath, ein gu/ot datz Egerdach, ein gu/ot datz Taukel, ein gu/ot haizzet Plaicch, ein gu/ot haizzet datz dem Grillen, ein gu/ot haizzet datz Ru/ogern an dem veld, daz gu/ot datz Nevpruch, ein gu/ot haizzet ze Mos, ein gu/etel haizzet Reut bei Mos, ein ander gu/otel haizzet Reut, do di Vngemecchinn ouf ist, den Hof ze Ierdorf und ein gu/ot ze Lohen besu/ocht und unbesu/ocht mit allem dem recht und dar zu geho/ert. Si sullen ouch di selben veste inne haben mit zimber und mit pow als zeitlich und pilleich ist, daz si nicht powvellich werde und nach ir tode ist di veste und di vorgenanten gu/olt und urbor uns und unsern nachchomen ga/entzlichen ledich an chrieg und an alle widerred. Dar uber geben wir in disen brief ze einem urchu/ende der worheit versigelt mit unserm und mit unsers capitels insigel. Der ist geben ze Salzburch des mitichen nach sand Michelstag, do von Christes geburd waren dreuzehen hundert iar dar nach in dem fu/omf und zwaintzkisten iar.||
SD. SD.

Source Fulltext: Salzburger Urkundenbuch, IV. Band, Urkunden von 1247-1343. Franz Martin. S. 357-358.