Daz avz der wandelweren zeit lang wernten dinge ich (icht) mugen bechrencht werden, vnd von gehugnusse icht entweichen, so ist dez durft, daz si wewart werden mit der vestigung gezeug vnd guter prief. Da von sei chvnt vnd gewizzen allen den, di nu sint oder nach chvnftig sint. Daz ich Alber von Clemens mit gutem willen meins selbs vnd meiner liewen hovsvrowe vron Margreten zehen lehen und svben hofstet vnd ein akker, vnd ein garten dacz Waeczlinsdorf fvr rechtes aygen als iz mich angestarben ist von meinen vordern mit allem recht vnd mit allem dienst, vnd ich iz gehabt han, iz sei an waieze, habern, swein, phenningen, vogtrecht, dorfgericht der erwern vrowen vron Offmein der Aptessinne vnd aller der Samnvnge dacz sand Bernhart verchouft han vmb drithalbhundert phvnt vnd vm fumf phvnt phennige der gemainen mvnzze also daz di vorgenante Abtessinne vnd ir samnvnge daz e genant gut mit allem nvcze, vnd si sein gehavven mvgen ewichleich wesiczen vnd wber daz gut gelob ich rechten scherm, als dez landes recht ist fu^er alle di, von den di vrowen mochten an dem selben gut schaden genemmen. Dar vvber vergich ich di wervnge vm daz vorgenant gut genczlich enphangen han, vnd daz gut mit samt meiner hovsfrowen hawen aufgegeben ledichlich vnd sein die Aptessinne hab gewaltig gemacht. Auch schvllen wizzen alle, di disen prief lesent oder lesen horent, daz ich Wilhalm vnd mein brvder Cadolt von Pavmgarten vergehen offenlich, daz wir gelobt hawen rechten scherm vvber daz offtgenant gut, als in dem lant recht ist mitsamt vnserm brvder hern Alber^en dem e genanten von Clemens. Daz awer disev dinch immer ewich vnd staet beleiben, so gew wir alle drei disen prief versigelten mit vnsern dreier insigeln vnd mit dem insigel dez edlen hern hern Stephan von meyssowe dez marschalchs in Ostereich. Dises dinges sint gezevge herr Stephan der e genant von meyssawe, her levtold vnd sein veter her Alber gehaizzen von Chvnring, her Alold vnd sein svn her Hainreich von Cheiowe, her Hadmar vnd her Wulfinch gehaizzen von Sunnberch, di all dinstherren sint, her herman von Clemens vnd her Vlrich von Chomestorf, di ritter sint, her Hainrich von Wilperch vnd Levtwein sein aydem vnd ander erwer vnd pidewe levt. Diser prief ist gegeben an der zwelifpoten tag Sand Symons vnd sand Jvdas nach Christes gepvrt Tovsent vnd zway hvndert iaren vnd in dem vier vnd newnczigistem iar. dacz dem Clemens in dem hovse.

Source Fulltext: ZEIBIG, Stiftungsbuch (=FRA II/6, Wien 1853) S. 209-210