Ich Vlreich gehaizzen der Pevger tven chvnt allen den di disen prief horent oder sehent peide di nu lebent oder her nach chvnftig sint, daz ich mit gutem willen meins selbes vnd meiner hovsvrowen vron Agnesen vnd meiner chinde Niclaz vnd Johans, Peters vnd Vlreich meiner svne, Sophein und Kathrein meiner tohter han verchauft ein lehen dacz sant Bernhart das e ze Chrueg hiez, vnd dient ein phvnt fur rechtez aygen vron Offmein der Aptessinne von sant Bernhart vnd aller der sampnvnge vmb fumfczehen phunt phenning der gemain munzze vnd vergieh, daz ich dez gutez genczlich gewert pin, vnd han iz aufgegeben mit samt meiner hovsvrowen vnd meinen chinden ledichlich fur rechtez aygen, vnd zv pezzer stoeticheit secz ich den vorgenanten Vrowen purgel hern Almar von Speissendorf, hern Perchtolten den Zobel, Nyclan mein svn, di von aygnem willen mit sampt mier vnd meiner hovsvrowen vnd meinen chinden gelobent scherm fur alle anschprach vnd ab ze legen allen schaden, alz in dem lande recht ist, vnd wand ich nicht ein eygens insigel han, so gib ich den oft genanten vrowen disen prief versigelten mit dem insigel dez erweren herren hern Seyfrides der Apte ze Altenburch ist vnd auch mit dem insigel dez herren hern Stephans von Meyssawe, der Marschalch ist in Osterrich. Der dinge sint geczeug herAdlolt vnd sein svne her Hainreich vnd her Chvnrat von Cheyawe her Haug vnd her Ott vnd her Reinprecht von Liechtenvels di dinstherren sint in Osterrich, her Wolfhart von Durrenpach, her Ott von Nevnburch, di Ritter sint. Her Hainreich der Wiltperger, vnd her Levtwein sein aidem, her Gotschalch von vronhoven, vnd sein svn her Chvnrat, vnd her Ludwich von sant Marein vnd ander frvmer levt genug. Disev dinch sint geschehen da von Christes gepurt warn Tausent Jar vnd zwai hvndert vnd Newnczig vnd nevn Jar an sant Stephans tag.

Source Fulltext: ZEIBIG, Stiftungsbuch (=FRA II/6, Wien 1853) S. 241-242