Ich Dietwein tvn chunt alle den di disen prief horent lesen oder sehent, daz ich han verchaufet zwai lehen daz Radwansdorf, di dienent ainlef schilling an vier phenning mit weisat mit alle vron Ofmein der Aptessinne von sant Bernhart vnd aller der Sampnvngvm vierczehenthalbes phvnt, vnd han daz getan mit gvtem willen mein selbs vnd meiner hovsvrowen vron Chunigunten vnd meiner chinde Ludweiges, Niclas, Hertwiges, duz (sic) mit sampt mir habent aufgegeben ledichlich fvr rechtes aygen vnd vergich, daz ich dez gvtes genczlich gewert pin vnd gelob auch scherm den vorgenanten vrowen alz landez recht ist mit sampt meiner hausvrowen vnd meinen chinden vnd zv pezzer stetigunge, so seczet vu^er mich ewentewer mein swiger vro Gedraut ain lehen dacz Praitenaich vnd Jmmerman auch ain lehen dacz Radwansdorf, vnd wiert auch fvr mich purgel Heinrich der Dachpech, Engelbrecht der Steinpech, Heinrich der Grv^enpech, di des gvtes schermer schullen sein fvr alle anschprach alz landez recht ist vnd schullen auch die vorgenanten vrowen auf in haben vnd auf der e genanten ewentewer, ob in an dem gvt, daz si von mir habent gechouffet chain schad geschech, vnd wand ich nicht ein eygens insigel han, so giw ich in disen prief versigelten mit dem insigel dez edlen herrn hern Stephans von Meyssaw, der Marschalch ist in Oesterrich, vnd mit dem insigel meins herrn hern Chvnrates von puchperk dez chnecht ich pin. Diser dinch sint geczirg her Adlolt von Cheyaw vnd sein svn her Heinreich vnd her Chvnrat her Wulfing vnd her Herman von Sunbereh, di dienstherren sint, her Ott von Nevnburch, her Hainreich von Pernharczdorf, die ritter sint, her Hainreich von Wiltperg vnd sein aydem her Levtwein, her Almar von Speissendorf vnd ander frvmer leut genug. Disev dinch sint geschehen nach Christes gepurd tausent iar vnd drev hundert iar an sant Gregorin tag.

Source Fulltext: ZEIBIG, Stiftungsbuch (=FRA II/6, Wien 1853) S. 277-278