Ich Otacher tv^en chvnt an disem prief allen di nv sint oder nach chvmftig sint, daz vro Sophey di Poppinne vnd Weichart ir svn heten verchavft zwai phvnt gv^elte vnd vier vnd zwainczig phenning dacz Gravenperge den vrowen von sant Bernhart vnd wand iz mein Oehem der Poppe van mir het gechauft, vnd mein geswistreiden, vnd also starb, daz er mich nicht gar het gewert, da schprach ich di vorgenanten vrowen an vnd ward iz lazzen an mein hern hern Stephan von Meyssawe peidenthalben der beschied mir vnd meinen geswistreiden zwai phvnt, di mir vnd in gegeben sint, vnd han iz aufgegeben vnd mein chint, vnd mein brvder vnd vrow Agnes mein swester vnd allev ierev chint fur rechtez aygen vnd wellen sein avch scherm sein als landez recht ist, vnd wand ich nicht ein aygnez insigel han, so giw ich in disen prief versigelten mit dem insigel dez edlen herren her Stephans von Meyssawe, der Marschalch ist in Osterrieh, vnd auch mit meins hern insigel hern Haidenreiches von Gors, dez chnecht ich pin. Diser dinge sint gezivg her Adlolt von Cheyawe vnd sein svne her Hainrich vnd her Chvnrat, her Herman vnd her Wulfing von svnberch, her Rueger der Pyber, di dinstherren sint in Oesterrich, her Ott von Nevnburch vnd her Hainrich von Pernhartsdorf di ritter sind, her Heinrich von Wiltperch, vnd sein aydem her leutwein, her Almar von Speisendorf und Gotschalch von vronhoven, die chnappen sint vnd ander vrvm levt genug. Diser dinch sint geschehen nach Christen gepurt tausent iar vnd drev hvndert iar an sant mathes tag in dem parmgarten dacz sant Bernhart.

Source Fulltext: ZEIBIG, Stiftungsbuch (=FRA II/6, Wien 1853) S. 231-232