Ich Poppe und ich Engelprecht von Liebenberch veriehen vnd thven chvnt allen lewten, di nu oder her nach disen brief sehen oder horen lesen. Daz wir paid mit gemainem rat und mit guetleichem willen unser mueter vron Offmein und unserr swester vron Gedrawten und iers wierts unsers geswei hern Otten von Mainberch und ouch unserr iungsten swester vron hailweigen haben verchouffet und oufgegeben vron Offmein der Aptessinn und ierr samnunge, den geistleichen vrowen da ze sand Bernhart drew lehen ze nidern Reczpach fu^er rechtz vnd freys aygen, daz alle iar dienet fu^enfzehen schilling umb achzehen pfunt beraiter pfenning, der wier schon gewert sein, Vnd daz selb guet hab wier alle, die hie vorgenant sind, oufgegeben besunderleich mit allem recht, alz wier ez haben gehabt oder haben scholden so daz wier fu^erbaz mit dem guet ze nidern Reczpach daz vorgenant izt, noch mit den lewten. nichtez nicht ze schaffen schullen haben. Daz hab wier oufgeben in die hant prueder Otten dez herren von Zwetel, der schaffer und verweser izt der vorgenanten vrowen ze sand Bernhart an allen ieren ouzzern gescheften. Dar vber so lob wier ovch Popp und Engelprecht und Ott die vorgenanten rechten landcs scherm, vnd dan och zu pezzer und voller sicherhait secz wier den vorgenanten vrowen ze purgel umb daz guet zwen dienstherren, hern Vlreichen von Chrumpach und hern Wulfingen von scheuenstain, also daz si ouf ier paiden aygen haben , was in an uns abget, vnd an ier igleichen besunder, waz an dem andern abget. Vnd zu ewiger stet dicz dings, so geb wier Popp und Engelbrecht vnd Ott vnd Vlreich vnd Wulfing, die hie vorgenant sind, den oftgenanten vrown von sand Bernhart und ierem vorgenanten schaffer an ier stat disen brief versigelten mit den insigelen hern Stephans von meyssow dez marsehalichs in Ostereich, vnd ovch mit vnser aller insigeln. Gezeug sind dicz dinges her Stephan von meyssow, der vorgenant, her Vlreich, sein sun. her Alold von Cheyow, her hainreich, her Chunrat sein sun. her Houg, her Reinprecht, her Ott die Tuersen von Liechtenvels, her Alber der Piber von Gruenberch, her Alber der strewn, die dienstherren, und her Ott von Newnburch, her fridreich von stewcz, her fridreich von sierndorf, die ritter, vnd her Almar von Speizzendorf, her hainreich von wiltperch, her lewtwein sein aydem, her hainreich von Dachpach die chnappen, und anderr pideber levvt genueg. Dicz dinch izt geschehen und diser brief izt gegeben in der stat ze Wienn, da man raittet von Cristes gebu^erd dreuzehen hundert iar vnd ain iar an dem andern eritag nach ostern, daz ist in der andern wochen nach ostern.

Source Fulltext: ZEIBIG, Stiftungsbuch (=FRA II/6, Wien 1853) S. 194-195