Ich Weczel gehaizzen Drezzedler tvn chunt allen den, di nv sint, ader nach chvnftig sint, di disen prief lesent ader horent lesen, daz ich mit guetem willen meines selbes und meiner havsfrowen vron Gedravten vnd meines chindes Elspeten, vnd meiner geswistreid Niclasen vnd Margreten han verchavft der Aptessinne vron Offmein von sand Bernhart vnd aller der samnvng ein halbes lehen dacz zelderndorf, daz dient ein halben mutte waicz vnd zwelif meczen hawern, vnd sechczig phennig, vmb dreizehen phunt, vnd vergich, daz ich dez selben gutes gewert pin, vnd han iz auf gegewen mit meinen vorgenanten vrevnten ledichleich fvr rechtes aygen, vnd gelob auch den vorgenanten vrowen scherm, als in dem land recht ist. Vnd zu pezzer stetigung, so secz ich den ee genanten vrowen pvrgel Niclan meinen bruder vnd Ludwigen von sand Marein vnd Hainreichen den Grille, di mit samt mir scherm gelobent nach landes recht, vnd waz an einem abgienge, daz schullen di oft genanten vrown hawen auf dem andern, vnd wand ich nicht ein eygnes insigel nicht han, so gib ich in disen prief versigelten mit dem insigel dez edln herren, hern Stephans von meyssaw vnd meines herrn des poppen von Liebenberch. Diser dinge sint gezeug her Adlolt von Cheyaw vnd sein sun her Hainreich, her reinprecht vnd her herman, vnd sein bruder her Wulfinch von sunnbergh: her Hauch vnd her Reinprecht di Tursen von Liechtenfels. di dinstherren sint in Osterreich, her Ott von Neunburch, her Fridrich von steucz,di ritter sint, her Almar von Schpeissendorf, her Gotschalch von Vravnhaven, her heinreich von Wilperch vnd sein aydem her Levtwein von fvennveld di chnappen sind vnd ander frvmer leut genueg. Diesew dinch sind geschehen, da von Christes gepurt waren dreuczehen hundert iar vnd ein iar an sand Wilhelms tag.

Source Fulltext: ZEIBIG, Stiftungsbuch (=FRA II/6, Wien 1853) S. 206-207