Ich Hadmar von Ottenstain tven chunt an disem prief allen leuten di nu sint oder her nach chunftig sint, di in lesen oder horen oder sehen, daz ich mit meiner hausvrawen Offmein gvetem willen mein gvt dacz Nidern Glokencz vierdhalb phunt vnd zwen phenning geltz meins rechtz vreiz aygen han verchauft vnd ledichlich gegeben mit mein selbs vnd mit meiner hausvrowen vnd mit meiner svn Otten, Hadmar, Ortliebs vnd Weikhartes hant den pidern leuten hern Otten Freitlen dem purger von Zwetel vnd Wolfharten vmb su^eben vnd dreizzig phunt an ainz min vierczig phenning, der ich schon gewert pin, vnd daz gut gib ich vnd mein hausvrowe vnd mein svne den vorgenanten leuten auf mit allem recht, alz ichz han gehabt fvr rechtez vreiz aygen mit dorfgerichte, mit witeie, vnd gelob daz ze scherinen in, oder swem si ez geben wellen, ich vnd mein pruder Ott, Weichart und Alber von Ottenstain nach dez landez recht, also daz ich vnd mein vorgenante prüder Otten Vreitlein vnd Wolfharten oder wem si daz guet geben, allen schaden ablegen schullen, den si von dehainer anschprach mit rechten nemen, vnd daz sev, Ott vnd Wolfhart, oder wem si daz guet geben, dicz schermes vnd dicz dingez gewiss sein, so geb wier, ich Hadmar, Ott, Weychart vnd Alber von Ottenstain in disen prief versigelt mit vnser vierer insigeln, vnd mit dem insigel hern Stephans von Meyssaw, der Marschalch ist in Oesterrich, vor dem dicz dinch ist geschehen, der sein auch geczeug ist. Dar vvber sint sein auch geczivg her Adlolt von Cheyaw und her Heinreich sein svn, her Vlreich, her Hadmar, mein ander zwen pruder, her Alber, her Vlreich, her Wernhart die Strevn, her Haug, her Ott, her Reinprecht di tvrsen, her Chvnrat der Werder von malemberch vnd ander piderb leut vil vnd genug. Dicz dinch ist geschehen vnd diser prief ist gegeben ze Zwetel in der stat da man raitt von Christes gepurt dreuczehen hundert iar vnd drev iar an sant philippes vnd an sant Jacobs tag.

Source Fulltext: ZEIBIG, Stiftungsbuch (=FRA II/6, Wien 1853) S. 283-284