Ich Ott von Wilhersdorf tvn chvnt allen leuten, di nu sint oder her nach chvnftig sint, di disen prief sehen oder lesen horen, daz ich mein gvt ze Gravenperch ein phvnt geltz han verchauft hern fridreichen dem richter von Horn vmb dreiczehenthalb phvnt phenning, der ich schon gewert pin, vnd daz selb gvt han ich im verchavft vnd ledichlichen auf gegeben fvr recht freyz aygen mit meiner hausvrowen vron Wilwirgen vnd mit meiner chinde Chvnrates, Vlreichs, Margreten, Annen gvtlichem willen vnd mit ir hant vnd dar zv gelob ich vnd mein zwen vorgenant svne Chvnrat vnd Vlreich vnd mit samt vns mein gesweien her Vlreich vnd her Ott die Purcdorfer daz selb gvt ze schermen nach dez landez recht, im oder swem er daz gvt geben wil, also daz wir im oder swem er daz gvt gibt allen schaden ablegen schullen, den si vmb daz gvt nemen vnd dehainen anschprach mit dem rechten, vnd daz dicz dinch gewiz vnd stoet sei, so gew wir, ich Otte von Willesdorfe vnd Vlreich vnd Vlreich vnd Ott die Purcdorfer hern fridreichen dem vorgenanten richter von horn vnd swem er dicz gvt gibt disen prief mit den insigeln hern Stephans von Meyssow der Marschalch in Osterrich ist, wand ich Ott von Willersdorf nicht aygens insigel han vnd mit vnser peider insigel Vlreichs vnd Otten der Purcdorfer. Geczevg dicz dinges sint der vorgenant herr von Meyssaw, vor dem dicz dinch ist geschehen, her Adlolt von Cheyaw vnd her heinrich vnd her chvnrat sein svne, her Wulfinch von Svnberch, di dienstherren, her Vlreich von steten, her Herbort von Hoven, di ritter, her Hiltprant, her Ortolf, di Grillen, her Ott der neuneker vnd ander pider leut vil. Dicz dinch ist geschehen vnd diser prief ist gegeben dacz Pulka, da man raitte von Christes gepvrt dreuczehen hvndert vnd drev iar an sant Vrbans tag.

Source Fulltext: ZEIBIG, Stiftungsbuch (=FRA II/6, Wien 1853) S. 232-233