Ich Houg der Tvrse von Lichtenvels tun chvnt an disem brieue allen lueten di nv sint oder di her nah chvnftig sint, daz ich mit min selbes wolverdachtem mvte vnd mit aller miner chinde gütlichem willen vnd hant Hainrichs, Hougeleins, Agnesen, Seifrids, Sophiein, Ylreichs, Reinprechts mit ir aller hant vnd willen gib ich den geistlichen vrowen vnd dem chloster da ze sant Bernhart zv miner tochter Eislein ain lehn mines rechten vreien aigens da ze Peigarten, da Vlrich Seifrids des Ammans svn avfe siezet vnd shol in dienen alle iar dreizig pfenningge an sant Mychels tag, daz gib ich in avf. vnd han inz avf gegebn mit min selbes vnd mit aller miner vorgenanten chinde hant ewichleichen ze habn mit allem rechte, als ichz, vnd mein vodern vnd min erben habn gehabt vnd gelobe in daz ze schermen nachs lands recht in oesterrich. Vnd zv einer ewigen bestetigvng dits dinges, so gib ich. vnd hainrich min elter svn. vnd min aeidem her Vlrich der Strevn. wan wir besvnderlich dits gvtes scherm gelobn fvr alle ansprach den vorgenanten vrowen von sant Bernhart disen brief versigelten mit vnser dreier ingesigel, vnd dits dinges geeivg sint her Stephan von Meyssow der marschalch in oesterrich, her Vlrich sin svn, her Levtold, her Alber von Chvnring, her Reinprecht, her Ott die Tvrsen min vetern, her Hadmar, her Ott, her Alber die brv^eder von Ottenstain, her Hainrich, her Chvnrat di brv^eder von Cheiow, di dienstherren vnd ander pider livt vil vnd genvog. Dicz dinch ist geschehn vnd der brief ist gegebn da ze sant Bernhart, do man von Christes gepvrt raitte Tavsent dreuhvndert vnd aeinlef iar ze Oestern am mitwochen inn Veirtagen.

Source Fulltext: ZEIBIG, Stiftungsbuch (=FRA II/6, Wien 1853) S. 214-215