Wir Vlreich vnd Ott di pruder di purcdorfer vnd Levtwein der Grvnepech von Vreuntsperch tv^en chvnt an disem prief allen leuten di nv sint oder di her nach chvnftig sint, daz wi^er vnser gvt sibenthalb phvnt vnd drei vnd zwainczig phenning geltes, dez da ze sant Bernhart im dorfe sint drev phvnt, vnd ains min sechczig phenning dacz Pivgen, zwelif schilling da ze prunne, ain halb phvnt, dacz Vronhoven ane sechs phenning ainlif schilling geltes, daz gut geb wi^er vnd habens gegeben durch got mit aller vnser geerben hant vnd gv^etlichem willen zv zwain iunchvrowen, der aine mein dez vorgenanten Otten tochter vnd aine mein dez ee genanten Liutweins tochter ist dem Chloster und der sampnvng da ze sant Bernhart vur rechtez vreyes aygen, daz si daz ewichlichen haben schullen mit allem recht, als wir daz haben gehabt vnd daz selb gvt gelob wi^er in ze schermen nach landez recht in Oesterrich wir alle drei, vnd vnser baider Ulreichs vnd Otten der vorgenanten svne Jans, Chunrat, Nicla vnd Chvnrat vnd auch alle vnser erben fu^er alle anschprach vnd vvber dicz dinch zv einer ewigen gewisheit geb wir der vorgenanten sampnvng vnd dem Chloster ze sant Bernhart disen prief versigelten mit vnser dreyer insigel vnd dicz dingez geezevg sint her Stephan von Meyssaw der Marschalch in Osterrich, her Vlreich sein svne, her Chalhoch von Ebersdorf der Chamerer, her Alber von Chvnring. her Ott von Zelkingen, her Chvnrad von Puhperch, her hovg der Tvrse, di dinstherren, her Hervort von Simeningen, her Chvnrad von niwendorf di ritter, vnd ander pidirb leut vil vnd genv^eg. Dicz dinch ist geschehen vnd diser prief ist gegeben dacz Wienn im Hoftayding da man von Christes gepurt raitte Tausent drevhvndert vnd ainlif Jar in dem letstem iar daz vorgenant ist am mittwochen in der Quotemper in der Vasten.

Source Fulltext: ZEIBIG, Stiftungsbuch (=FRA II/6, Wien 1853) S. 242-243