Ich Peters von Hohenberch Tuen chund allen lewten, die nu sind, oder her nach chunftig sind, die disen brief lesen oder horen lesen, daz ich zwelif und ein halbs pfunt pfenning geltz ouf zwain hofsteten und ouf weingarten dacz Waiczendorf, daz selb guet han ich verschouffet mit meines sunes hern Meinharcz und mit meiner tochter vron Elzpeten und mit meines wiertes hern Wilhalms vom pain guetem willen und mit ier hant den geistleichen vrown und der Samnung dacz sand Bernhart umb siben pfunt wienner pfenninge, der wier alle schon gewert sein, und daz selb gu^et hab wier alle vier in ouf gegeben mit freyer hant fu^er freyes aygen fu^er uns selben und fu^er alle unsere eriben mit allem recht, daz wier oder unser eriben dar an haben gehabt, und mit vier und zwainzk taiding pfenning, die dar zue gehorent, und geloben in daz guet ze scherm, alz dez landes recht in Ostereich izt. Vnd uber dicz selb dinch so geb wir, Ich Peters, Elzpet, Meinhart, Willhalm, die vorgenant sind, der vorgenanten Sampnung daz sand Bernhart disen brief versiegelten mit dez vorgenanten meines wiertes hern Wilhalmes und meines sunes hern meinharts insigeln, wand ich und mein tochter nicht insigel haben. Gezeug dicz dinges sind, her Stephan von meyssow mein ohem, der marschalich in Ostereich, her Vlreich sein sun, her Leutolt, her Alber von Chunring, her Ott von Celkingen, her Ott von pilichdorf mein Aydem, her Chunrat von Cheyow, die dienstherren in Ostereich, und anderr piderber leut genueg und vil. Dicz dinch izt geschehen und diser brief izt geben dacz alten Lempach ouf dem hous, da man raitt von Cristes gebu^erd Towsent drew hundert und aindlef iar an sand Elzpeten tag.

Source Fulltext: ZEIBIG, Stiftungsbuch (=FRA II/6, Wien 1853) S. 192-193