Ich Hainrich der Tvmracer tvn chvnt an disem brieue allen liuten, di nv sint, oder di hernach chvnftig sint, di in sehn, oder hoeren lesen, daz ich mit miner housfrowen Katherein gvtliehen willen vnd mit ir vnd mit miner sune fridreichs, Ebrans Herliebs hant verchaufft han min lehen da ze Celderndorf min reehtez aigen, daz da dient auf sand Mychelstage dreizig metzen waitzs vier vnd zwaincig metzen habern egenburger mazz, vnd ain halb pfvnt pfenninge den geistlichen vrowen der samnvng da ze sant Bernhart, vmb fvnfcig pfvnt pfenninge, der ich schon gewert pin. Daz han ich in vnd an ir stat bruder Arnoltn irm schaffer lediclichn auf gegebn vor miner vrowen vron Wilbirgen der Grevin von Hardek vnd vor Graf Perchtoltn von Maeidburg mit allem recht, als ichz han gehabt, vnd gelob in dar vber rechten lands scherm ich vnd min bruder Örtel. Dar vber gib ich in disen prief ze ainer bestetigung mit minem ingesigel versigelten. Geciug dits dinges sint der vor genante Graf Perchtold, vnd her Vlrich, her Ott di Purtdorfer, herr Ott, her Ortlieb di Cendl, her herbort von Houen, di ritter. Johan der purtdorfer. dietrich von Niwsez, Perchtolt von Heslern di knappen vnd ander pider liute vil vnd genuog. Ditz ding ist geschehn vnd diser brief ist gegebn, da ze Retz avfm hous, da man von Christes geburt raitte driucehn hundert vnd zwelif iar an sant Kathreinen tage.

Source Fulltext: ZEIBIG, Stiftungsbuch (=FRA II/6, Wien 1853) S. 207