Wir Vlrich, Herman und Perchtold, hern Vlreichs sune von Steten, tvn chvnt an disem brieue allen liuten di nu sint oder di her nach chvnftig sint, di in sehen oder hoern lesen. Daz wir mit guetlichem willen vnd mit rat vnd mit woluerdachtem muet Vnserr lieben mu^eter vron Agnesn vnd anderr vnserr vriunde verchauft habn da ze Liutacker vnsers rechten aigens vier pfvnt gelts ane achtcehn pfenninge an pergrechte vnd an ainr hofstat den geistlichen vrowen vnd der Samnvng da ze sant Bernhart vmb drev vnd sechscig pfvnt pfenninge wienner mu^entz, der wir schon gewert sein. Daz selb gut hab wir in auf gebn vor vnserr vrowen der Grevin Wilwirgen von Hardek vnd vor vnserm herren Graf Perchtoltn dem ivngen und vor iren rittern vnd knappen. Vnd gelobn inz ceschermen als aigens recht izt in Oesterreich. Vnd daz ditz ding immer stete sei, dar vmb geb wir der vor genanten samnvng da ze sant Wernhart disen brief versigelten mit min Vlreichs des vor genanten ingesigel, wan wir zwen Herman vnd Perchtold noch nicht ingesigel habn. Vnd ouch mit vnser vrowen der grevin Wilwirgen von Hardek der vorgenanten ingesigel. Vnd mit vnsers herren des vor genanten graf Perchtolds ingesigel, di ouch dits dinges geciug sint. Dar u^eber sint geciug dits dinges her Vlreich, her Ott di Purtorfer, her Ott, her Ortlieb di cendel, her Herbort von houen, di ritter o^ertel vnd Wernhart von Staerein, Herman schober, Johan Purtorfer, Tetzel der hofrichter, Perchtold von Heslern, Ditreich von Niwsez di Knappen vnd di purger von Pulka vnd ander pider liut vil vnd gnuog. Ditz ding ist geschehn und diser brief ist gegebn da ze Pulka in dem marcte bruder Arnolten der vor genanten vrowen schaffer, da man raitte von Christes geburt dreucehn hundert vnd Zwelif iar. An sant Merteinstag.

Source Fulltext: ZEIBIG, Stiftungsbuch (=FRA II/6, Wien 1853) S. 185-186