Wier Agnes von gotes genaden weilent chv^eniginn ze vngern veriehen vnd tuen chund allen den, di disen prief sehent oder horent lesen, daz wier mit verdachtem muet vnd mit guetleichem willen ze der zeit, do wier ez wol getuen machten nach vnsers peichtiger vnd nach anderr gueter lewt rat haben geschaffet vnd geben den erbern geistleichen vrowen grabes Ordens dacz sand Pernhart zu ierem goczhovs einen weingarten, der haizzet der Zwetler vnd izt in dem tal dacz Rechperg gelegen, der vnser recht gechovftes purchrecht izt, vnd den wier mer dan rechte tag in nucz vnd in gwer gehabt haben, vnd haben in ovch den selben weingarten ovfgegeben recht vnd redleich mit dez perchmaisters hant nach dez landez recht vnd gewonhait, daz si in inn schullen haben vnd niezzen ewichleich an allen chrieg in alle dem recht, als wier in inn gehabt haben ze rechtem purchrecht ouf die pu^erch ze Rechperg da von dienen, vnd schullen ovch von dem vorgenanten weingarten vnsers lieben herren vnd wiertes chunig Andres von Ungern dem got genad, iartag begen an sand felicis in dem pincis tag mit messen, mit vigilien, mit allen gueten dingen, alz gwondleichen izt. Wenn awer got vber vns gepewtet, so schullen si den vorgenanten iartag begen ouf den tag, alz vnser iartag gevellet, vnd vnser paider iartag mit einander begen mit gotes dienst alz vor geschriben stet. Wer awer daz die vorgenanten vrowen den vorgenanten iartag nicht begiengen alz vorgeschriben izt von ierr soumchait, so schol der egenant weingart ledig sein dem goczhovs dacz Zwetel vnd schullen die herren von Zwetel den weingarten inn haben in alle dem recht, alz wier in den vrowen gegeben haben, vnd schullen si vnser vnd vnsers lieben herren vnd wiertes iartag da von begen mit dem gotes dienst alz vor geschriben stet. Vnd daz disev red vnd sach ewichleich vnzebrochen beleib, versigeln wier disen prief mit vnserm insigel, vnd zv einer pezzrerr sicherhait pitten wier die erbern herren Ortolf Dechant dacz Chrems vnd ruedolfen von Orbuerch, vnd Hainreichen von Cheyow daz si ier insigel an disen prief henchen zv einer offen zevgnuzz diser sache. Der brief izt geben ze rechperch do man zalt von Christes geburd Tawsent iar, drew hvndert iar, da nach in dem vierczehentistem iar an sand Gorgen tag.

Source Fulltext: ZEIBIG, Stiftungsbuch (=FRA II/6, Wien 1853) S. 257-258