Ich Graf Perchtolt von Hardek vnd purcrafe von Meidburch vergih vnd tvn chvnt an disem brief allen liuten di nv sint, oder di her nach chvnftig sint, di in sehn oder hoeren lesen, Daz ich den geistlichen vrowen vnd der samnvng da ze sant Bernhart dvrch got vnd dvrch meins Ohems Graf Perchtols und meiner mvmen Grevin Wilwirgen von Hardek sel willen gechavffet han von dem selgerat, daz si geschaft hat ze fvedrvng dem hous vnd avch meinem chind fvmf pfvnt vnd zwei min dreizig pfenning gelts dacz Strantzendorf fvr rechtez aigen, als ich iz vor meinem herren Chvnig Fridreichn auf enphangen han, daz si da pei meins Ohems und meiner mvmen mit trewen gedenchen. als si mit maniger gvetet wol hincz in gevodert hat. Vnd daz dise red gancz vnd stet belib, des gib ich in dar vber ze vrchvnd vnd ze bestetigvng disen brief versigelten mit meinem insigel. Gezevg avch dicz dinges sint mein brveder Graf Pvrchhart, herWernhart vnd her Chvnrat di herren von Schavmberch, mein ohem von Meyssawe her Vlrich, der Marschalch ist in oesterrich vnd des vorgenanten chlosters stifter, vnd mein ritter di caendel pede, vnd di Purtdorfer vnd her Ernst von Schiding vnd ander piderb levt vil vnd genvog. Dicz dinch ist geschehn vnd diser brief ist gegebn daz Retz in der stat, do man raitte von Christes gebvrt drevcehn hvndert iar vnd fvmfczehen iar an sand Gilgen tag.

Source Fulltext: ZEIBIG, Stiftungsbuch (=FRA II/6, Wien 1853) S. 222