Ich Vlrich der Sachsse, hern Vlreichs svn von Steten, Tun chvnt an disem brieue allen liuten, di nv sint oder di her nach chvnftig sint, di in sehen oder hoern lesen. Daz ich mit gu^etem willen vnd mit wolverdachtem mute mein selbes vnd meiner housfrowen vron Offmein verchauft han den geistlichen vrowen vron Elsbeten der Aptesinn vnd der samnvnge da ze sant Bernhart aeinen akker, der leit bei irem aigem da ze Liutaker der min rechtez aigen ist, vmb sibentzehn pfvnt wienner pfenning, der ich schon vnd wol gewert pin, vnd gelob in den selbn akker ze schermen nachs lands recht in Oesterrich, vnd ze ainer ewigen bestetigvng dits dinges, so gib ich den vorgenanten vrowen von sant bernhart disen brief versiegelten mit mines herren Graf Perchtolten von Hardek ingesigel vnd mit min selbes ingesigel. Geziug ouch dits dinges sint mein vorgenanter herre graf Perchtolt von Hardek, her Stephan von Meyssaw der marschalch in Oesterreich, der stifter ist desselbn closters, her Vlrich, sin svn, her Ott vnd her Hartlib di cendel, her Vlrich, her Ott di Purtdorfer, her Herbort von Gehoven, her Herman der schober, di ritter, und Jans Purtorfer und Taetzel der ivng. Ditz ding ist geschen vnd diser brief ist gegebn da ze Pulka in dem markt, do man raitte von Christes geburt dreucehen hundert vnd sechscehn iar an sant Jorgen tage.

Source Fulltext: ZEIBIG, Stiftungsbuch (=FRA II/6, Wien 1853) S. 186