Ich Hainreich von Dachpach tv^en chvnt an disem prief allen levten di nv sint oder di her nach chvnftig sint, di in sehen oder horent lesen, daz ich mit gv^etlichem willen vnd mit wol verdachtem mvet mein selbs vnd meiner havsvrowen vron Margareten vnd mit aller meiner chind vnd erben gvtem willen vnd mit ir hant nach meiner vreunt rat verchaufet han den geistlichen vrowen vnd der Sampnvng dacz sant Bernhart meins rechten aygens anderthalb lehen dacz Siczendorf di alle iar dienent ain phvnt vnd drei phenning an sant Michels tag vmb sibenczehen phvnt phenning wienner mvnzze, der ich schon vnd wol gewert pin, vnd daz selb gvt han ich in auf geben fvr rechtez aygen, als iz von meinen vodern an mich chomen ist, fvr mich selb vnd fvr mein erben mit allem recht, daz ich oder mein erben dar an haben gehabt, und gelob in auch daz ze schermen als landez recht ist in Osterrich, Vnd ze gewizzer bestetigung dicz dingez gib ich den vorgenanten vrowen von sant Bernhart disen prief mit meins herren, hern Vlreichs insigel von Meyssaw, der Marschalch ist in Oesterrich vnd dez vorgenantez chlosters stifter, vnd auch mit meins selbs insigel. Geczevg auch dicz dinges sint mein vorgenanter herr her Vlreich von Meyssaw, der Marschalch ist in Oesterrich her Alber vnd her Johannes di hern von Chvnring, her Hainreich vnd her Chvnrat von Cheyaw, her Alber der Strevn, her Rudger der Piber, di dinsthern vnd mein sweher her Almar der Hofrichter, vnd reinbot von vronhoven mein aydem vnd ander erber levt vil vnd genvg. Dicz dinch ist geschehen vnd diser prief ist gegeben da ze sant Bernhart da man rait von Christes gepvrt drevczehen hvndert vnd sechcehen iar an sant Merteins Tag.

Source Fulltext: ZEIBIG, Stiftungsbuch (=FRA II/6, Wien 1853) S. 252-253