Ich Houg von Liechtenvels, dienstman in Oesterrich vergich vnd tvn chunt an disen brieue allen liuten, di nu sint oder die her nah chumftig sint, daz ich durh got vnd durh miner sel hail zv miner tochter Elslein hin zu sant Pernhart den geistlichen vrowen vnd der Samnunge mit wol verdachtem mut mit aller miner erben willen vnd mit miner svne Haugen, Seifrieds, vnd Vlrichs willen vnd hant gib vnd han aufgegeben ain lehen vnd ain hofstat, daz Heinrich der stifter nv zv pvrcrecht hat von mir da ze Peigarten im dorfe, daz dient alle iar auf sant Michels tag ain halb phunt phenninge. Daz lehen vnd di hofstat han ich in gegeben mit der aigenschaft vnd mit allem recht als ich vnd min vodern daz gehabt haben vnd herpracht haben, daz si daz gut zv miner tochter Elslein ewichlichen haben schullen. Vnd dar vber zv ewiger bestetigunge gib ich der vorgenannten Samnunge ze sant Pernhart disen brief versigelten mit minem Insigel. Dits dinges geciug sint min Ohem her Vlreich von Meyssow, her Hainrich vnd her Chvnrat von Cheyaw, her Alber, her Hadmar, herr Ott von Ottenstain, her Alber her Wernhart di Strevn, di dienstherren vnd ander pider liut vil. Dicz ding ist geschehen vnd diser brief ist gegeben ze Liechtenuels aufm hovs, do man raitte von Christes geburt driucehen hvndert iar vnd sibencehen iar an sant Agathen tage.

Source Fulltext: ZEIBIG, Stiftungsbuch (=FRA II/6, Wien 1853) S. 215-216