Ich Chvnrat vnd Weichart wir zwey brueder gehaizzen di Hvntaffen von Grabarn tvn chvnt an disem brief allen levten, di nv sint, oder di her nach chvftig sint. di in sehn oder horen lesen. Daz wir mit guetlichem willen vnd mit woluerdachtem mvet vnser selbes vnd vnsers vetern, hern Weichartes des Hvntaffen vnd nach sein vnd ander vnser frevnt rat an alle arig liste verchavffet habn den geistlichen vrowen vnd der samnvnge dacz sant Bernhart daz purchrecht an einem lehen, daz wir selb gepawet habn dacz Weczlensdorf vmb zehen vnd hvndert pfvnt pfenning wienner mvnz, der wir aller schon vnd wol gewert sein, vnd wand di aigenschaft ir selber gewesen ist, so hab wir in daz purchrecht ledichleich avfgegebn ze besiczen vnd ze habn ewichlich ze veld vnd ze dorfe mit allem dem recht daz wir daran habn gehabt, oder habn scholden, Vnd wand wir in da wider niht habn ze seczen ze ebentewer, so secz wier in ze purgel des selben guetes vnsern vorgenanten vetern hern Weicharten den hvntaffen vnd Paulen von Sitzendorf vnd Engelprechten den Wiltperger von Lindenberch Vnd ze gewizzer bestetigung ditz dinges gib ich den vorgenanten vrowen vnd der Samnvng von sant Bernhart disen brief versigelten mit vnser peder insigel vnd auch mit vnser dreier uorgenanten purgel insigel. Gezeug auch dits dinges sint Graf Perchtolt von Hardek, her Wernhart von Schovmberch, her Vlreich von Meyssawe des vorgenanten chlosters Stifter, her Hainrich vnd her Chvnrat di Cheyawer, her Alber der Strevn vnd her Ott der Stalekker, di dienstherren vnd vnser vorgenanten veter her Weichart, Vlreich von Frevnctspech, Pavl von Sitzendorf, vnd sein brveder Ott, Jacob von Grabarn vnd Eberl von tanne. Dicz ding ist geschehn, vnd diser prief ist gegebn dacz sant Bernhart do man raitt von Christes geburt drevzehen hvndert vnd achzehen iar an vnser vrawen tag in der vasten.

Source Fulltext: ZEIBIG, Stiftungsbuch (=FRA II/6, Wien 1853) S. 213