Ich Tomas vnd Chvnrat vnd Dyetel wier drei pru^eder von Ochsenpach ueriehen vnd tvn chvnt an disem prief allen levten, di nv sint, oder di her nach chvnftig sint di in sehen oder horen lesen, daz wier mit wolverdachtem mut und mit gutlichem willen vnser selbes vnd avch vnser hovsfrowen vnd mit aller vnser chind vnd erben willen vnd mit ir hant nach vnser freunt rat verchavft haben den geistlichen vrowen vnd der Samnvng dacz sant Bernhart funf schilling geltes dacz Horn di man da dient von purchrecht anehern fvr recht vreis aygen, als iz von vnsern vorvoren an geerbt hat vnd Dyetlein vnsern iungsten brvder zv seinem erbtail angevallen waz an dreizzig vmb fvmf phvnt phenning wienner munzz, der wir alle schon und wol gewert sein, vnd haben in daz selb gvt ledichlich aufgegeben ewichlich ze haben mit allem dem recht, daz wir oder vnser erben dar an gehabt haben oder haben schulten vnd gelaben in auch daz selb gvt ze schermen als aygens und landes recht ist in Osterreich, vnd seczen in ze ewentevr ein halb lehen dacz Ochsenpach da Dietl auf siczet, daz si dar auf haben swaz si schaden an dem vorgenanten gvet nemen, vnd wand wir selb nicht eigens insigel haben, so geb wir den vorgenanten vrowen vnd der sampnvng dacz sant Bernhart disen prief versigelten mit vnsers herren, herren Vlreichs insigel von Meyssawe, der Marschalch ist in Osterrich, vnd des vorgenanten Chlosters stifter, Geczevg auch dicz sint der vorgenant her her Vlrich von Meyssaw, her Hainreich von Cheyaw, her Ott von Stalek, her Ott der Friczesdorfer, her Ortolf der richter von Horn, Heinreich der Zolner, Vlreich der Mauter, Ortolf der Fleishakcher, Fridreich der Fleishakcher, Heinrich der arm, di purger von Horn. Dicz dinch ist geschehen vnd diser prief ist gegeben dacz Horn in der stat, da man rait von Christ gepurt drevezehen hvndert vnd achezehen jar an vnser Vrowen abent ze der Liechtmesse.

Source Fulltext: ZEIBIG, Stiftungsbuch (=FRA II/6, Wien 1853) S. 239-240