Ich Ott von Stalek tuen chund an disem brief allen lewten, die nu sind oder die her nach chunftig sind di in sehen oder horen lesen, daz die guet vrowe vro Elzpet von reczpach geschaffet hat ein halbs lehen dacz reczpach den geistleichen vrown und der samnunge dacz sand Bernhart durich ierr sel hail, vnd daz si ieren iartag mit trewen begen. Daz selb halbes lehen habent si verchovffet vmb vierczig pfunt pfenning wienner muenzz. Nu han ich angesehen die trew, die si in got zu mier habent, und durch meiner vrown vron Elzpeten der Aptissinne vnd durich der vorgenanten samnung willen han ich mich underwunden der selben vierczig pfunt pfenning, vnd pin der ovch schon und wol gewert, vnd mit wolverdachtem muet vnd mit guetleichem willen mein selbs und meiner hovsvrown vron Kathrein und mit aller meiner eriben willen und mit ier hant han ich in da fuer gegeben zwai pfunt geltes dacz reczpach meines rechten freyen aygens mit allem dem recht, alz ich ez han gehabt vnd ez von meinen vodern an mich chomen izt, vnd gelob in daz selb guet ze schermen fuer all ansprach, alz landes recht izt in Ostereich, daz si ovch mein und aller meiner vodern gedenchen, alz ich in dez getravve. Vnd zu gwizzem vrchund und bestetigung dicz dinges gib ich in disen brief versigelten mit meinem insigel. Gezeug ovch dicz dinges sind der erber herr Apt Ott von Zwetel, dez vorgenanten chlosters geistleicher vater, Prueder Gerung, der selben vrown schaffer, mein ohem, her Vlreich von meyssow, der marschalich in Ostereich, dez vorgenanten chlosters stifter, her Chuenrat von Hadmastorf, friedreich der Chriech von Freitschlarn, Vlreich und Levvtvvein die Gruenpechen vnd anderr pideber lewt vil und genueg. Dicz dinch izt geschehen vnd diser brief izt geben dacz Rosenberch ovf dem hovs da man raitt von Cristes gebu^erd drewzehen hundert iar, vnd newnzehen iar an sand Mathias tag.

Source Fulltext: ZEIBIG, Stiftungsbuch (=FRA II/6, Wien 1853) S. 196-197