Ich Weichart der Grueber vergich vnd tvn chunt allen den di disen prief lesent oder horent lesen, di nu lebent vnd her nach chunftig sint, daz ich mit wol verdachtem mut meins selbs vnd mit gutem willen vnd gunst meiner hausvrowen vron Gedrauten, vnd mit guter gunst meiner chinder Lewtweins vnd Engelprechts, Agnesen vnd Margreten vnd auch mit gvetlichem willen aller meiner erben ze der zeit da ich iz wol getvn mochte verchauft han meinz rechten aygens zehen phenning geltz, di da ligent dacz Tavenhof auf oede recht dem erweren mann Fridreichen dem Holempechen vnd seinen erben vmb fvfthalb phunt wienner phenning, der ich recht vnd redleich gewert pin, wand aber der selb fridreich der aygenschaft nicht gehaben mag, da von so han ich peide durch got vnd auch durch seiner pet willen der vorgenanten zehen phenning geltz aygenschaft gegeben in vnser vrowen eren dem chloster vnd der samnung hincz sant Bernhart, also daz der e genant fridreich di selben gu^elt von dem selben chloster ze purchrecht haben schul, vnd schol da von einen dienst geben, der fuegleich sei dem selben chloster, vnd lob ich peide dem vorgenanten chloster dacz sant Bernhart di aygenschaft, vnd dem e genanten Fridreichen daz chaufrecht der selben zehen phenning geltz freyn vnd schermen fu^er alle ansprach alz dez landez recht vnd gewonhait ist in Oesterreich, also daz er allen seinen frvm damit schaffen mag verchauffen, versezen oder geben swem er welle mit der Aptessinne willen vnd der sampnung von sant Bernhart, vnd giw ich dar vvber der vorgenanten sampnung hincz sant Bernhart vnd auch dem e gesriben fridreichen zv einem ewigen vrchund vnd zu einem warn geczevg diser sache aller versigelten mit meinen insigel disen prief. Dez sint geczeug pruder fridreich ze den zeiten schaffer dacz sant Bernhart, her Syman der pharrer von Reinprechtz, her Niclas der pharrer von Nevnchirchen, her eysenreich vnd her herman di Wersenslager vnd ander erwer leut genug, den dise sach wol chunt ist. Der prief ist gegeben nach Christes gepurt dreuczehen hundert Jar dar nach in dem Sybendem vnd zwainczigistem Jar an sant Bartolomes tag.

Source Fulltext: ZEIBIG, Stiftungsbuch (=FRA II/6, Wien 1853) S. 280-281