Ich Alber vnd ich Wernhart vnd ich Vlreich di Strevn von Swarcznaw vergehen vnd tvn chvnt allen den di disen prief lesent oder horent lesen, daz wir mit wol verdachtem mv^et vnd mit aller vnser erben gvnst der zeit, da wir iz wol tu^en mochten, die aygenschaft dez halbes lehens, daz Eberhard von Tanne von vns ze lehen gehabt hat vnd gelegen ist in dem dorf ze Wezlinsdorf, vnd daz di Abtessinne Elsbeth von eberharten von Tanne vmb ir aygens gvt chavft hat, di aygenschaft haben wir gegeben den vrowen dez Convencz von sand Bernhart vnsern selen vnd vnsern vorderns selen zv einem selgerat mit allem dem recht, vnd da zv geho^ert gestift vnd vngestift versvcht vnd vnversvcht, wi daz genant ist, vnd sein auch der selben aygenschaft ir gewer vnd ir scherm vor alle anschprach nach dez landez recht in Ostereich. Da zv dvrch gvter sicherheit willen so lo avch ich Vlreich der Strevn an mens prvder Pilgreims stat allez daz ze behalten, daz vorgeschriben ist an diesem prief. Daz dicz red stoet vnd vnzebrochen beleib, dez giw ich Alber vnd ich Wernhart vnd ich Vlreich di Strevn von Swarczenaw disen prief versigelt mit vnsern insigeln zv einem offen vrchvnd vnd zv einem warem gezevg. Der sach sint gezevg di edln herren Graf Perchtold vnd graf Purchart graven von Hardekk vnd Burchgraven von Maydbvrch, her Ortlieb Zoendel von Teraczpvrch, sein veter her Ortolf Zendel, der Span vom Wasen, her Ott von Pvrtorf, Meinhart der alt richter ze Recz vnd ander erwer levt genvg, den di sach wol chvnt ist. Der prief ist geben da von christes gepvrt ergangen sint drevzehen hvndert iar in dem siben vnd zwainczigistem iar dez Vreitags an sand Severins tag.

Source Fulltext: ZEIBIG, Stiftungsbuch (=FRA II/6, Wien 1853) S. 214