Ich Jorig von Gotzesdorf vnd ich Margret sein Hausvrowe wir veriehen vnd tun chunt allen den, di disen brief lesent oder horent lesen, di nv lebent vnd her nach chunftich sint, daz wir mit vnser Erben gueten willen vnd gunst mit verdachtem mvt vnd mit gesampter hant zu der zeit do wir is wol getun mochten vnd mit vnserr Lehenherren hant der Edeln herren der Grafen von Schavwnberch verchavft haben vnsers rechten Lechens, daz wir von in ze lehen gehabt haben, dreu phunt wienner phenninge geltes, die da ligent datz Ziegsdorf auf drin lehen bestifts gvtz mit alle dem nutz vnd recht, als wir di selben drev phunt geltes in Lehens gewer her pracht haben vmb viertzich phvnt wienner phenninge der wir gar vnd genczleich gewert sein Dem Erberen geistleichen vrowen swester Sapheyn grefinne von Maydburch zu den zeiten Aptessinne datz sant Pernhart vnd dem Conuent gemain des selben chlosters vnd allen irn nachchomen furbaz ledichleich vnd vreyleich ze haben, vnd allen irn frumen damit ze schaffen, verchavfen, verseczen vnd gewen swen si wellen an allen irresal, vnd dar uber ze einer pezzern sicherhait so setzen wir vns ich Jorig von Gotzesdorf vnd ich Margret sein hausvrowe vnd vnser Erben vnuerschaidenleich uber die vorgenanten drev phvnt phenninge wienner geltes den egenanten geistleichen vrowen gemayn datz sant Pernhart vnd allen irn nachchomen ze rechtem gewern vnd scherm fur alle ansprach, alz lehens recht ist, vnd des Landes recht ze Osterrich. Wer aber daz si mit recht an der selben Gult icht chrieges oder ansprach gewunnen, swaz si dez schaden nement, daz suln wir in allez avz richten vnd wider chern an alle ir mve vnd allen irn schaden vnd suln auch si daz haben auf vns vnd auf allem vnsren gut daz wir haben in dem lande ze Osterreich, wir sein lebentich oder tode. Vnd daz diser chauf fvrbaz also stet vnd vnzebrochen beleibe, dar vmb so gib ich in disen brief zv einem warn vrchvnde vnd zv einer ewigen vestnunge diser sache versigelt mit meinem insigil vnd mit dez edeln herren insigil hern Stephans von Meychssawe vnd mit meiner Oehaym Insigiln Gotschalichs von Vronhouen vnd Reymbotes von Peugen, di diser sach gezeuge sint mit irn insigiln. Diser brief ist geben datz sant Pernhart nach Christes gepurt dreutzehen hundert iar darnach in dem vier vnd viertzigisten iar an sant Jorigen tag.

Source Fulltext: ZEIBIG, Stiftungsbuch (=FRA II/6, Wien 1853) S. 224-225