Wir Hainreich vnd Chunrat, Wernhart, Rudolf vnd Fridreich Grafen ze Schavnberch veriehen vnd tun chunt allen den di disen prief lesent oder horent lesen, die nu lebent vnd her nach chunftig sint, daz wir mit vnsern erben willen vnd gunst vnd mit vnserm rat zu der zeit, da wir ez wol getun machten, innerchleich durch got vnd vnser frown willen haben gegeben der erwirdigen frawen, vnser lieben Muemen vrown Sophein Grafinne von Maydburch vnd zv den zeiten Aptessinne dacz sant Pernhart vnd den gaestlichen frawen der Sampnunge des vorgenanten chlosters di aygenschaft dreyrr pfunt pfenning geltes wienner muntz, de si chavft hat von dem beschaiden Chnett Jorgein von Gotzeinsdorf, di der selb Jorge zv rechtem lehen von vns gehabt hat, die selben drew pfunt gelt sint gelegen datz Tziegsdorf auf drin lehen. Ez schullen auch di vorgenanten vnser liebe Muem dev Aptessinne mit der sampnung di vorgeschriben ehenschaft ledichleich vnd gaentzleich furbaz zehaben ze rechtem aygen aygenschaft inne haben gehabt. Vnd daz disev sach fu^erbaz ewichleich staet vnd vntzebrochen beleibe dar vmb so geb wir Hainreich vnd Chunrat, Wernhart Rudolf vnd Fridreich Graven ze Schavnberch den vorgenanten frown datz sand Pernhart disen prief ze einem offen vrchund vnd ze einem waren zevg diser sache versigelt mit vnsern anhangunden insigeln. Der Prif ist geben ze Schownberch nach Christes gepvrd drevtzehen hundert iar, dar nach in dem vier vnd viertzbigisten iar an sand Jorgen tag.

Source Fulltext: ZEIBIG, Stiftungsbuch (=FRA II/6, Wien 1853) S. 223-224