Ich Gerhart der Gneusse vnd Agnes sein hausvrowe veriehen vnd tvn chvnt allen di disen prief lesent oder horent lesen, di nu lebent vnd her nach chvnftig sint, daz wir mit woluerdachtem mut unser selber vnd mit gvtem willen aller vnser erben vnd nach zeitigem rat aller vnser vreunt vnd mit gesampter hant zv der zeit, da wir iz wol getvn machten, verchavft haben der Ersamen vrowen vron Anne vnd der Samung alle dez chlosters ze sant Bernhart vnsers rechten, vnd vnversprachen aygens, vnd daz mich vorgenantev Agnesen von meinem vater vnd von meiner mu^eter eriblich an erstariben ist, vnd daz von meinen geswistreiden vnd von allen meinen vreunten ein ledigez vnd. ein getailtz gvt ist, vnd daz ich vnd mein vorgenanter wiert her Gerhart der Gneuzze vnd vnser vorvoren vnd derselben gerben uncz an disev zeit vnversprochenlich vnd in rechter aygens gewer her pracht haben Nevn schilling vnd dreizehenthalb phenning gelts, der da ligent dacz Modrich in dem dorf auf einen lehen LX phenning, auf dem di zeit gesezzen ist Elspet di Maierinn vnd auf einer hofstat fumf vnd vierczig phenning, auf der gesessen ist Ludwiech der schuster, vnd auf einer hofstat vier vnd dreizzig phenning, auf der gesezzen ist Gedraut di Stifterinn, vnd auf einer hofstat dreizzig phenning, auf der gesezzen ist Nicla der Stocherner, vnd auf einer hofstat zehen phenning, auf der da siczet Margret di sehentlin vnd avf vberlent an drei helbling vierthalb schilling geltz. Daz vorgeschriben gvt allez hab wir verchovft der ee genanten vrowen vron Annen der Aptessinne vnd der Samnvng alle ze sant Bernhart mit allem recht, als iz vnser vorvorn vnd derselben gerben an vns vnd vir vncz an disev zeit haben gehabt ze dorf vnd ze velde, gestiftez oder vngestifts versuechts oder vnversuechtz vnd vnverscheidenlich di nucz di darauf gesein mugen mit recht, wie dev genant sint vnd mit aller vreyung als grawer orden haben schol, vmb zwainczig phvnt wienner phenning, der wir gancz vnd an allen schaden ze verhaizzen tagen gewert sein, vnd schullen sev mit dem selben gvt allen ieren vrum schaffen mit verchaufen, mit veseczen vnd mit aller wandlung, die in dar auf fueglich ist. Ich secz mich auch vorgenanter Gerhart vnd mit mir vnd nach mier alle mein eriben ze rechtem gewer vnd scherm dez oft genantez gvtz vnd lvben iz der ee genanter ersamen vrowen vron Anne der Apptessinn vnd der samnvng alle ze sant Bernhart schermen vnd auz ze richten fur alle anschprach als aygens recht vnd dez landez gewonheit ist in Oesterrich. Tet wir dez nicht waz sev denn schaden nemen an dem vorgenanten gvet den selben schulle wir in an alle ier mue widercheren oder ab wir daran savmig wolden sein, so schullen sev sein mit vnsrem gvtlichem willen bechomen von alle dev, daz wir haben in dem lant ze Oestereich. Vnd dar vber zv einem waren vrchvnde vnd ewiger stoeticheit diser sache giw ich Gerhart der Gneusse dem oft genantem chloster ze sant Bernhart disen gegenwuertigen prief versigelten mit meinem insigel, vnd dar zv mit Gerhartes insigel meins svnes vnd mit Vlreiches dez Velebrunner vnd mit Go^etfricz dez Redeprunner meiner aydem insigeln, di sich vnder den selben insigeln mit allen iren erben verpindent ze rechten gewern vnd scherm dez oft genanten gv^etes mit der chraft, alz ich mich verpunden haw, vnd di auch mit den selben insigeln bezevgent daz si noch ier erben noch in dhain recht oder anschprach ewichlichen schullen haben auf daz vorgenant gv^et. Dicz dinch ist geschehen vnd diser prief ist gegeben nach Christes gepvrt vvber dreuczehen hvndert iar, darnach in dem siben vnd vierczigistein iar an dez heiligen herren sant Jorgen Tag.

Source Fulltext: ZEIBIG, Stiftungsbuch (=FRA II/6, Wien 1853) S. 236-237