Wir vrow Haylweig Grefin von Maydwurch zvden zeiten Aptessinn dacz sand Pernhart vnd der covent gemain do selbs vergehen offenleich mit vrchund des priefes daz wir mit wol bedachtem muet vnd mit gemainem rat vnd zu der zeit, do wir daz wol getuen machten, gegeben haben ze chauffen vnsers rechten vnd vreyn aygens ain pavngarten ze Gruenberch vnserm holden Hansen demGaffsen vnd seiner hausvrow Annen, vnd ir payder tochter Agnesen also zu dryn leyben vmb drewczehen phunt wyenner phenning, der wir gancz vnd gar von im gewert sein, also beschaidenleich, daz si vns ierchleich do von dienen schullen unverzogenleich vmb die weynachten ayn halb phunt phenning, vnd wenn der egenant Hans der Gaffs, vnd sein hausvrow Ann vnd ir payder tochter Agnes mit dem tode abe gent, so schol der egenant pavngarten genczleich vnd an allen ansprach vnd wider red gevallen an daz chloster. Vnd daz die wandlung also stet vnd vnzebrochen beleib, gebe wir in den prief versigelten mit vnserm vnd vnsers covencz anhangunden insigeln, der geben ist nach Christi gepuerd, drewezehen hvndert iar dar nach in dem drew vnd Achczgistem iar an sant Jorigen tag.

Source Fulltext: ZEIBIG, Stiftungsbuch (=FRA II/6, Wien 1853) S. 304-305