Die Beswarung beschehen hern Sigmunden abbt vnd dem gozhaws s. Pauls. – Am ersten, so sazen sich die leute gemainklich all, so zum geslos gen Rabenstain gehorn, aines Zolls im Markht zw s. Pauls ze geben, darumb das gotzhaus s. Pauls genug brief vnd sigl hat. – Zum andern ain hofwisen gelegen in der Awen vnder Kollniz, darin dem gotzhaws s. Pauls wider billich auch irrung vnd ingriff beschieht von ainem pawren genant Kristandl gesessen an des Graczl hof neben der wisen, gehort auch gen Rabenstain. – Zum dritten, das hern Vlrichen von Weisbriach knecht aus beuelh seines Phlegers von Rabenstain in des gotshaws pigmerkh vnd grundten bey s. Johanns gelegen holcz abgehakht haben vnd gen Rabenstain. gefurt. – Desgleichen der Mayr vnder Loschental zw s. Oswald, gehort auch gen Rabenstain, hat dem gotzhaws auch irrung tan in den pigmerkhen, so gelegen sein im Offenlein. – Aber ain pawr gesessen in des Hainrich guet an der strassen am Gornsueld, so gen Rabenstain gehort, tuet dem gotzhaus irrung in grunden, als sich in Vecher erfunden werden. – Der Pfleger von Lauemund Janes von Droswicz wil von dem goczhaus s. Pauls ain Vorst Recht von ainem wald haben, ist man im nicht schuldig zegeben, vnd hat darauf beuolhen bey den sein, vnser lewt damit auf zwhalten.