Wir Caspar, von gottes genaden abbte, und der gemain convent des gotshauss sand Quirein ze Tegernsee in Freisinger bistumb, sand Benedicten orden, dem edeln und vesten herren, herren Ruegern von Starchenberg, umb erlangung ewigs hails in got, den herren, nach ewrer andechtigen begir zu uns, unnserm orden und gotshaus geben wir ew volkomne mittailung aller guttat, die got, der herre, durch sein genadenreiche miltikait durch uns und all unnser nachkomen wurchent ist in heiligen messen, vasten, kestigung, wachen, andechtigen gebeten und annderer gaistlicher übung und nemen ew ganntz in die gemain unnsrer bruderschaft und, so wir von ewrm tod, den got selig machen welle, erinnert werden, so wellen wir umb ewrer seel hilf und trost tun, als umb annder unnsrer sammung frewnt und günner der bruderschaft gewonhait ist. In kraft des brieves mit unnsern baidenn anhangenden insigeln besigelten an suntag vor sand Marteins tag im viertzethenhunderten und im sechsundfünftzigisten jar.