Quoniam generationum aliis transeuntibus aliis succedentibus tamquam penalitas quedam humanis sensibus inflicta est obliuio, merito prouidens sibi humana ratio ad sue recordationis auxilium scripture congruum adinuenit remedium. Presenti igitur scripto vniuersorum tam presentium quam futurorum clareat memorie in posterum, qualiter Gerungus sacerdos et monachus ecclesie Gerstensis eiusdemque loci tunc temporis prepositus rationabili consideratione ductus cum consensu et plena prelati et fratrum suorum uoluntate possessiones subscriptas conparauit intendens salubriter, ut de earundem possessionum annuis prouentibus annua procuratio conuentui Gerstensi in die Natali beate Katharine in cibis et potibus sollempniter exhibeatur. Quarum possessionum duo prediola in territorio Gerstensi sita venerabilis Bertholdus abbas vna cum prefato Gerungo a domino Rudolpho de Heimburch pro XXVIII talentis conparauit, que prediola VII solidos denariorum usualis monete absque stiura annuatim persoluere consueuerunt. Preterea prediolum in Enstal de uilla Edlinge duabus Marcis conparatum fuit, cuius annuus prouentus per omnia sunt Ix denarii frisacensis monete. Insuper domus quedam in Můnde, quam Marquardus de Adelwanc vir nobilis precio iiiior talentorum uendidit, tradita per manus filiorum suorum ad annuum censum v solidorum stat locata. Testes autem horum contractuum, qui presentialiter interfuerunt, videlicet milites, ciues et diuerse conditionis homines quam plurimi, cum distinctionibus nominum et integra tocius rei serie in autentico Gerstensis ecclesie Registro plenius adnotati repperientur. Harum itaque possessionum prouentus tam minores quarn maiores predictus venerabilis B. abbas vna cum concordi fratrum fauore ad opus prelibate capelle, sicut superius expressum est, irreuocabiliter et quasi cum decreto constituit, humiliter et sub inprecatione diuine vltionis supplicans, ne quis successorum suorum tam salubre institutum ausu temerario in irritum audeat reuocare. Actum anno dominice incarnationis M.CC.XXXIII. prememorato uenerabili Bertholdo abbate Gerstensi ecclesie feliciter presidente, Yringo priore, Vlrico hospitalario, wolphero plebano, Wigando custode existentibus, cum aliis venerabilibus eiusdem ecclesie sacerdotibus et diaconibus, videlicet Marquardo, Duringo, heinrico de prvel, heinrico de Enstal, heinrico de Moln, heinrico cauda, Friderico, Rudolfo, Rudwino, johanne et ceteris omnibvs.

Source Fulltext: OÖUB 3 (Wien 1862) S. 17-18, Nr. 15