Nos Otto dei gratia Ecclesie Patauiensis Episcopus notum facimus vniuersis has litteras inspecturis, quod ad Ecclesiam Gerstensem cum dilectis in Christo fratribus Or. Medlicensi, Ph. Schotorum sancte Marie de Wienna, R. de Sittansteten, Vl. de Altenburch, Fr. de Gleunch Abbatibus ordinis sancti Benedictj, ... de Paumgartenberg Abbate ordinis Cysterciensis, fratre Johanne ordinis predicatorum de Chrems, M. Tumpreposito, Wer. de Morspach et magistro Hert. Scolastico Patauiensi super reformatione status eiusdem Ecclesie, qui inter abbatem dominum Vlricum et conuentum erat multipliciter perturbatus, personaliter venientes post multa, que hinc inde fuerunt coram nobis a partibus proposita, induximus abbatem et Conuentum, quod se gratie nostre super omni causa sua pie et simpliciter sine omni condicione voluntarie submiserunt, promittendo ad manus nostras vice sacramenti firmiter et sincere, ut ratum tenerent per omnia et seruarent, quicquid inter ipsos de consilio predictorum prelatorum duceremus iuxta sancti Benedicti Regulara ordinandum. Quapropter sicut nostra interest finem inponere litibus cupientes recipimus in scriptis articulos vniuersos a partibus, quos ad inuicem proponere habuerint, et super eisdem cum predictis prelatis habito consilio diligenti rogauimus fratres predicti Conuentus et eos induximus cum effectu, ut abbatj suo predicto debitam obedientiam et reuerentiam exhiberent, in quo per dei gratiam nostris precibus annuentes eidem abbatj debitam obedientiam promiserunt singillatim ad manus ipsius et reuerentiam tamquam patri et ab utraque parte remittentes ex corde, quicquid inter se habuerunt odij uel questionis, in pacis osculo se pro maiori concordia adinuicem receperunt. Vnde in uirtute sancte obedientie abbatj mandauimus et rogauimus efficaciter et attente, ut ipsos fratres Karitatiue pertractet de cetero et benigne, ad quod etiam se fide data firmiter obligauit. Et ut ab ipsis tollatur in futurum omnis materia questionis, de predictorum prelatorum consilio sic duximus statuendum, ut abbas in victu et vestitu de consilio Prioris, Gerungi quondam Abbatis, Ottonis Graeselinj et Cherspergarij prouideat fratribus, iuxta quod in animas suas facultates Ecclesie sufficere dixerint in premissis, de quorum de cetero et consilio et scientia tractabit ardua Ecclesie negotia vniuersa. Preterea sigillum Conuentus sub clausura trium clauilium statuimus fideliter obseruandum, quarum vnam aput abbatem, alteram aput Priorem, terciam aput vnum de fratribus volumus remanere , et nullas litteras cum eodem nisi de predictorum trium consensu et consilio sigillarj. His igitur omnibus publicatis sollempniter in communj et sepedictorum prelatorum consensu et voluntate per singulos requisito, cum de ipsorum consilio tractata fuerint omnia supradicta, sicut coram nobis interrogati dixerunt singuli clara voce predictam formam tam ab abbate quam a toto Conuentu mandamus et precipimus de cetero firmiter obseruarj, innodantes exnunc excommunicationis uinculo In nomine patris et filii et spiritus sancti omnes et singulos, per quos predicta forma concordie fuerit aliquomodo violata. In cuius rej testimonium presentes litteras conscribi de consilio et voluntate predictorum Prelatorum fecimus et nostro ac ipsorum Sigillis necnon et canonicorum presentium mandavimus communirj. Actum in Gersten Anno dominj M. CC. LXI. XII. Kalendas Decembris.

Source Fulltext: OÖUB 3 (Wien 1862) S. 281-282, Nr. 299