Nos Otakarus dei gracia Bohemie Rex, Dux Austrie, Stirie et Karinthie Marchioque morauie, Dominus Karniole, Marchie, Egre ac portus Naonis presentibus protestamur, quod accepta querimonia Friderici Gerstensis abbatis super grauaminibus, que in duabus villis in terminis Austrie constitutis circa partes prouincie Ragtz et Litschowe castrorum scilicet Munchru^et et ad Gerstenses per aduocatos sustinuit hactenus minus iuste, ac inspectis priuilegiis, que nobis idem abbas exhibuit manu sua de iuribus monasterii prelibati reperimus euidenter, quod in dictis duabus villis nullus esse debeat aduocatus, nisi quem abbas de bono animo duxerit postulandum. Quia vero, quod sepe in remedium queritur, vertitur, illud circa dictas prefati monasterij duas villas sufficiens exemplum noscitur accepisse, cum aduocatos sibi propicios sepe dictum monasterium quereret et aduersarios postmodum inueniret, tamquam qui sub vmbrosa iusticia plus requirerent a colonis, quam ipsis dei seruitoribus ministrarent. Volumus igitur et districte mandamus, quatenus nullus defensor villarum superius expressarum moderamen excedat, set gratanter accipiat, quod deinceps per abbatem sibi datum fuerit pro labore, quem sustinet deffendendo. Datum Winne pridie Idus Maij.

Source Fulltext: OÖUB 3 (Wien 1862) S. 405-406, Nr. 442