Ich Meinhart der rihter vnd die gesworn der rat von Lintz tv^en allen den chunt, die den prief an sehent, daz wir allen den chriekch, den vlreich der Pfenninch vnd sein hausvrawe vre Chunigvnt vnd ir tohter Margaret enneher hawent gehabt vmb ir peder eribtail, haben verschaiden vnd verrihtet nach der pesten puriger rat von der stat ze Lintz vnd avch nach desselben chindes Margareten nachster vreunde rat vn avch mit gv^etem willen des selben chindes Margareten vnd avch mit gv^etem willen vlreiches des pfennings vnd seiner hausvrawen vren Chvnigvnden vnd ist avch daz geschehen paidenthalben on allez vu^erzokch mit rehter vu^erzihte Also, daz vlreichen dem pfenninge vnd siner hausvrawen vren Chu^enigunden werden sol div sattzvnge avf der hofstat zenechst dem Harbrunner vnd div Hv^eb datz Leuntinge vnd der hof avch ze Levntinge auf dem perige vnd der weingarte datz Pach kegen Tyernstaine, Daz si mit dem gv^ete, daz hie benant ist, ewichleichen schaffen svln ze verchauffen oder ze versetzzen, zv^e swiv si des bedurffen, daz sev dar an niemen irren sol. Dar vmbe ist dem vorgenanten chinde Margareten beschaiden vnd gegeben ledichleichen div zwai haus pei dem tor, da der wagner Chv^enrat da inne ist vnd daz ze nechste vor an dem selben hause leit kegen der strazze, Icz sol avch vlreich vnd sin hausvrawe daz selbe chint Margareten vnd div vor genanten heuser inne haben, daz man daz chint mit den selben heusern bestatten mv^eg. ist awer, daz daz selbe chindel stirbet ê, daz man iz ze manne geb, so svlen dev selben heuser sein mv^eter vren Chv^enigvnden hin wider an erben as ê. Iz stet avch daz voder haus, daz dem chinde beschaiden ist Margareten nevn pfvnt pfenninge, daz selbe haus sol im avch vlreich der Pfenninch vnd sein hausvrawe des chindes mv^eter lo^esen vnd ledikch machen in drin iaren von dem hofcins vnd die selben losvnge sol daz selbe chindel haben avf der hofstat zenechst dem harbrunner, Daz disew red nv vu^erbaz an alle wider red stêt vnd immer mer ewikch sei, da gewen wir disen brief vber ze v^erchv^ende mit vnser stat insigel bestetet vnd mit den gezivgen, die pei der selben gescheffte sint gewesen, Daz ist Her Ewerhart von walsse Lantrihter ob Ens, Her Meinhart der rihter, Her vlreich der mautter, her Hainreich der Prantter, wernhart an dem v^erfar, jacob von wels, Hainreich der Chroppf vnd ander piderb Leute. Ditz ist ze Lintz geschehen von Christes gepu^ert Tausend jar, zwai hundert iar, in dem ohte vnd ochtzkisten iar an dem ohten tag sant Agnesen tag der marterrerrinne.

Source Fulltext: OÖUB 4 (Wien 1867) S. 81-82, Nr. 84