Wir bruder Ott vnd Perchtold schechen genant tvn chvnt allen den, di disen prief lesent, horent oder sehent, di nv leben. vnd nach chvnftig sint, Daz perchtold Scheche mit gutlichem willen vnser baider gegeben hat daz Gu^et auf dem graben versuht vnd vnversuht ze holz vnd ze veld, daz lehen von dem Lantzherren ist, durch vnser vodern vnd durch seiner vnd vnser brůder vnd vrevnt sel willen zv einem selgeret auf vnsers herren leichnamens Alter ledichlichen an allen chrige vnd sol auch gewer sein fůr alle ansprach. Daz di wandlunge stete vnd vnverchert beleib, geb wir disen brief zv einer vrchvnde versigelt mit vnsern baiden insigeln vnd mit des insigel Peters ponhalm, der ze den selben ziten phleger ze steyr was, vnd sint des zevge erber levt di her nach geschriben sint: Her Heinrich Streler, Her Heinrich prevhafen, Dietrich von volchenstorf, Ott hurnwech, Heinrich Lipker, Heinrich enser, Jans phonzagel vnd ander erber levt. Ditz ist ergangen nach christes geburde vber drevzehen hvndert Jar vnd dar nach in dem drevzehenten Jar ze Svnbenten.

Source Fulltext: OÖUB 5 (Wien 1868) S. 110, Nr. 108