Ich Thomas zu den ziten Hern Dithers diener von Hintperge vergich vnd tvn chvnt an disem prief allen den, di in lesent, sehent oder horent, di nv lebent vnd noch chvnpftig sint, Daz ich mit verdachten mvt vnd mit gv^etlichen willen vnd mit miner vrevnt rat min rechtes erbe vnd min aigen daz halb lehen datz Gundramstorf, daz an zehen ein halb phunt phenninge dint wienner mvnz an sand Michels tag, vnd den weingarten an dem wartperge, der da Haizzet der nevnburger, dem Gotshaus ze Gersten zv einem selgeret geben han also, daz ich daz halb lehen vnd den vorgenanten weingarten nne haben sol vntzen an minen tode vnd alle Jar zv einem vrchunde da van geben sol dem apt hintz Gersten ein dreilinch weines auz dem vorgenanten weingarten vnd an zehen ein halb phunt phenninge von dem halben lehen vnd noch minem tode ist daz vorgenant aigen lehen vnd weingart ledichlichen des Gotshaus ze Gersten vnd sol der apt von dem vorgenanten aigen alle Jar geben dem oblayer des andern tages noch sand andres tag vier phunt phenning, ain phunt, daz man minen Jartag begê, vnd drev phunt, daz sand Benedicten alter alle tag ain messe hab vnd der prister zwen phenning, swelher do sprech. Daz di sach stete beleib vnd vnverchert, gib ich disen prief zv einem ewigen vrchunde versigelt mit der erbern Herren hangvnden Insigeln Hern albers von Chunringe, Hern Hadmars des Stuchseu vnd Hern Dithers von Hintperge vnd sint des zevge Her Heinrich vud Her Marchart prevhefen, Peter ponhalm rihter ze Styr vnd sein bruder philipp, Ott Hurnbech, Chunrat von plesse, wlfinch, ott chersperger, Ott greul, Heinrich muhler, helmbich purger ze Styr, Heinrich, Jans, Heinrich lipker, Heinrich enser, Peter, Stephan, perchtolt amman des aptes diener ze Gersten, Her Cirvos von merswanch vnd sein svn Her Jans, Her Trevslib, Leupolt von Gundramstorf vnd sein svn Meinhart, Ortolf pluemstingil, Heinrich iudig, Geisilher, Heinrich mulner vnd ander erber levt genvch vnd ist daz geschechen, da nach christes gepurde ergangen warn drevzehen hundert Jar vnd dar nach in dem ahtzehenten Jar an vnser vrowen Tage ze der Lichtmesse.

Source Fulltext: OÖUB 5 (Wien 1868) S. 204-205, Nr. 206