Ich Ott Schech purchrof vnd phleger in der purch ze Steyr vnd alles des gutes, daz dar zv gehoret, van miner Herren gnaden der fursten in Osterich Tun chvnt allen den, die disen prief lesent oder horent, di nv lebent vnd nach chvmpftig sint, Daz zv mir chomen ist Nycla der stier purger ze Steyr vnd sein hausvrowe Elspet mit allen iren erben vnd auch mit aller ir vrevnt rat vnd mit ir gutlichem willen vnd auch nach minem rat habent geben ledichlich ein Hu^eb, dev leit ze hulbarn in Tu^edeicherphar vnd haist an dem obern ort, dev rechtz aigen ist vnd in an erstorben ist van allen seinen vodern, auf vnser vrowen alter hintz Gersten zv dem lieht, des der custer gewaltich ist, swer der ist, durch Got vnd vmb zwai vnd funfzich phunt phenninge wienner mvnz mit sampt der selde vnd mit allev vnd dar zv gehoret, versuht vnd vnversuht, ze holz vnd ze velde vnd sol der vorgenant Nycla vnd alle sein erben der vorgenanten hu^eb gewer sein, als lantz reht ist. Dar vber ze einem ewigen vrchunde vnd zv einer guten sicherhait gib ich disen brief mit minem anhangvnden Insigel. Vnd sint des zevge Her Marichart vnd Her Ott prevhefen, Ott Hurnbech, friderich steger, wernhart lerpuhler, Wulfinch, Ott Chersperger, Heinrich Muhler, Ott Grevl, Helmwich vnd vlrich chevfman, purger ze Steyr vnd ander erber leut genvch. Vnd ist daz geschehen, da ergangen warn nach christes geburde drevzehen Hundert Jar vnd funf vnd zwainzich jar an Sand Nyclas tag.

Source Fulltext: OÖUB 5 (Wien 1868) S. 445, Nr. 444