Ich Hainrich von Aschperg, mein Hausfraw vnd all vnser paider erben verichen vnd tuen chunt allen den, di disen prief sehent, lesent oder ho^erent, daz wir mit wolbedachten muet vnd mit vnserm guetlichen willen Marcharten dem venkken, seiner Hausfrawn Preyden vnd ir paider erben versaczt haben vnser guet dacz Neidperch genant dacz dem purger am Ort gelegen in Sirnikcher pfarr, daz vnser aijgen ist, mit allen den nutzen, di dar zů geho^erent ze holcz vnd ze veld, versuecht vnd vnuersuecht vmb zwai vnd vierczk pfunt pfening wienner můnzz also beschaidenleich, swann wir in die selben pfening geben vnd genczleich widercheren, so schol ez wider vnser ledigs guet sein alz êe. Wir sein auch desselben guets vnd saczz oder wem si den in antwurrttent, ir gewer fu^er alle ansprach, wo in des du^errfft geschiecht nach Lancz recht, gieng in aber an dem selben saczz vnd gewerschafft icht ab, swaz si dez schaden nement, den s vns pei iren trewn sagent, den schallen si haben auf vnsern trewn vnd auf allrer vnserr hab, di wier haben in dem Lande, swo so die gelegen ist. Daz in die red stêt vnd vnuerchert beleib, dar v^eber gib ich in vorgenanter Hainrich von Aschperch disen prief zu ainem vrchu^end der sachh gevestend mit meinem anhangunden jnsigel vnd zu ainem sichtigen gezeug mit meines frevndes anhangunden insigel Alrames der (sic) Sinczenperger versigelt. Der prief ist gegeben, do nach Christes gepu^erd waren vergangen drewtzehen hundert iar vnd dar nach in dem Syben vnd zwainczikisten iar, des nêgchsten Mitichen nach sand Michelstag.

Source Fulltext: OÖUB 5 (Wien 1868) S. 493, Nr. 495