Wir apt Ott van Gotz gnaden vnd die Sampnvng des Gotshaus ze Gersten tvn chvnt an disem brif allen den, die in sehent, horent oder lesent, di ny lebent vnd nach chvmpftig sint, Daz wir vns dar zu gebunden haben mit zwain messen ze sprechen, da mit man sol Hern Perchtoltz von losenstayn gedenchen ewichlich vmb sein andacht, di er hat getan mit zwain guten, die er vns hat gegeben vreilich an alle ansprach mit seiner Havsvrowen vren Margreten vnd mit aller seiner bruder vnd mit aller ir erben gutlichem willen. Daz ain Gu^et haizzet datz dem schachen vnd leit bei weigsteten vnd dint drev schaf chorns vnd zwai Habern, ein Gans, vier hvner, zwai vaschanchhvner, sehzich ayr, vier ches vnd daz selb gut sol der apt inne haben vnd sol di drev chaf chorns haizzen pachen vnd tailn an sinem Jartag. Daz ander gut haizzet datz den holzern paidev in Sirnicher pharr gelegen vnd dient daz selb gut den Herren in die Oblay zwelfthalben schillinch phenning an vnser vrowen tag ze der dinst zit vnd sol man van den selben phenning alle wochen zwo messe haben an dem Mitichen vnd an dem vreitag vnd ein halb phunt den Herren geben an sinem Jartag van der vigili vnd van der selmesse, ob wir daz indert savmeten an ehaft not ze drin vierzehen tagen, so svln sich ir erben der vorgenanten gut vnder winden so lang, daz wir ervollen daz selb gelub. Daz im disev gelub stete beleiben, geben wir im disen brif ze vrchvnde versigelten mit vnserm Insigel vnd mit vnsers Conventz Insigel vnd ist der geben, da ergangen warn van christes geburde dreuzehen Hundert Jar, dar nach in dem ainz vnd dreizikisten Jar an der aindleften tausent maeit tag.

Source Fulltext: OÖUB 6 (Wien 1872) S. 41f., Nr. 34