WIr apt HeinRich van Gotz gnaden ze Gersten offen vnd tvn chunt an disem brif allen den, di nv lebent vnd nach chumftig werdent, Daz Chunrat chamerer genant vnd vnser diener ze den selben ziten den Hof an der Prantstat genant, den er mit sinem gvt hat gechauft, Hintz Gersten vnser vrowen gegeben hat durch seiner vnd allen seiner vodern sel also, swer des Gotshaus ze Gersten Herre vnd phleger ist, sol an allen chrige vnd widerrede den Herren in daz Chloster geben alle Jar an Sand Go^ergen tag ein halb phunt phenning wienner mvnzze, daz man seiner vnd seiner vodern sel gedenchen sol mit vigil vnd mit einer selmess alle Jar nach sand Gorgen tag. Daz di sach also stet vnd vnverchert beleib ewichlich, geben wir ze vrchvnde disen brief versigelt mit vnserm Insigel vnd mit ChunRat Chamers (sic) vnd mit Jansen seines O^ehaims Insigel vnd sint der sach zevge Her vlrich priol pavsweck genant, Her hartlib, Her Hertinch custer, Her Fridrich van Melch, Her Erchenger sultzer bruder ze Gersten, HeinRich enser, Richer amptman, Heinrich lipker diener ze Gersten vnd ander erber leut. Der brif ist gegeben nach christes geburde, da ergangen warn Drevzehen hundert Jar, darnach in dem drev vnd dreizigisten Jar am weinahtobent ze Gersten.

Source Fulltext: OÖUB 6 (Wien 1872) S. 111f., Nr. 102