Ich Ott Schech datz Styr in der purge gesezzen mit sampt miner Hausvrowen vren Gedrauten vnd mit allen vnsern erben vergich vnd tvn chvnt allen den, di disen brif sehent, ho^erent oder lesent, Daz ich mit wol verdachtem mvt vnd mit ganczem willen mines hertzen han gegeben hinz Gersten dem Gotshaus vnd der bruderschaft da selben in di Oblay den Hof in Pechemperger pharr gelegen, der da haizzet in der awe, durch miner vnd aller miner vodern sel hail vnd willen (sic) vnd auch durch mines chindes willen Otten, daz man in den orden nemmen sol. Ob daz aber geschech, des wir Got niht getrawen, daz daz chind ê sturb, ê iz den orden enphieng, so sol der vorgenant hof dennoch dez Gotshaus selgeret sein van aller miner vodern sel. Wer aber daz, daz dem Gotshaus dehain chrig oder arbait van dem vorgenanten hof an ginge, den sol daz Gotshaus vnd di brudersehaft ze Gersten haben auf alle dev vnd ich in dem lande han. Daz di sach also stet vnd vnuerchert beleib, gib ich disen brif ze einem vrchvnde versigelten mit meinem jnsigel. Der brif ist geben, da ergangen waren nach christes gebu^erde drevzehen hundert jar vnd dar nach in dem drev vnd dreizickisten jar an Sand Andreas obent ze Gersten. Vnd swerm der furst oder sein phleger ze Styr datz Gotshaus ze Gersten des vorgenanten hofes geweltig mach, so sol der brif wider gegeben werden an alle widerrede.

Source Fulltext: OÖUB 6 (Wien 1872) S. 109f., Nr. 100