Wir Ott von Gots gnaden Hertzog ze Osterreich vnd ze Steyer Tun chunt offenleichen mit disem brif, Daz ez vor vnser vmb di Hueb, di leit ze moln bei der Chirchen vnd vmb daz lehen, daz leit bei Moln auf der Haide, di zwischen der erbern Alhaiden, hainrichs des Lonstorfer havsvrowen vnd Erntravten Rugers seligen witiben von Moln in chrieg gewesen sind, also geschaiden vnd vertaidingt ist, daz di vorgenant hueb vnd lehen furbas an allen chrieg der vorgenanten Alhaiden hainrichs des Lonstorfer havsvrowen mit alle dev, daz dar zu gehoret, ir vnd irer erben sein sol also, daz di vorgenant Erntravt noch ir erben si mit ansprach noch mit chainerlay sache daran nicht irren sol noch mag. Vnd des zu einem vrchunde geben wir disen brief versigelten mit vnserm Insigel. Der ist geben ze Steyer an Sunntag Oculi Nach Christes geburde Dreutzehenhundert iar, dar nach in dem funf vnd Dreyzzigistem Jar.

Source Fulltext: OÖUB 6 (Wien 1872) S. 151, Nr. 145