Ich Herbort der Perndorfer ab dem hals vnd mein Hausvraw Hailweich vnd alle vnser erben Wier veriehen vnd tuen chunt offenbar an disem brief allen den, di den brief sehent, lesent oder horent lesen, Daz wier mit wol pedachtem muet vnd nach vnser vrewnt willen vnd rat vnd du wier iz wol machten tuen, ze chauffen haben gewen di guet dacz chremstorf, di vnser vreizz aygen sint gewesen Also wier sew inn haben gehapt in nucz vnd in gewer ze holcz vnd ze velt, versuecht vnd vnuersuecht an gever, Fridreichen dem Tungozzinger vnd seiner hausvrawn vrawn Katrein vnd allen iern Erben Vmb Achzich phunt phenneng, Der si vns redleichen vnd recht pericht habent. Wier schullen auch der vorgenanten guet ier gewer sein fuer all ansprach, di di vorgenanten guet an ruereten, van swelcherlai sach daz wer, also dez lancz recht ist. Wer awer daz, daz wier dez nicht enteten, wittan schaden si den nemen, den si bei iern trewn megen gesagen, den schulle wier in ablegen vnd schullen daz haben auf vns vnd auf aller vnser hab, swo wier dew haben. Daz in dew redd also stet vnd vnverchert peleib, dar vber giw ich in Herbart der vorgenant Perndarfer disen brief versigelten mit meinem anhangunden insidel. Der brief ist gewen, du man zalt von Christes gepuert Tausent jar, drewhundert jar darnach in dem sechs vnd drei sigisten jar des Mitichen in den Phinchst veigertagen.

Source Fulltext: OÖUB 6 (Wien 1972) S. 207, Nr. 203