Wir Apt Michel von Gotes gnaden vnd der Gantz Convent der bruderschaft ze Gersten offen vnd tvn chvnt allen den, di disen brief lesent oder horent, di nv lebent vnd nach chvnftig sint, Daz wir vns ivnge vnd alt gemainchlichen dar zv willichlichen gepunden vnd gelubt haben alle wochen drey messe ze sprechen in dem Capitel hern Perchtolden van losenstayn vnd sol ein ewiges lieht dar inne brinnen naht vnd tag vnd hat er dar vmb dem Gotshaus vnd der Sampnvnge ze Gersten gegeben den Hof ze Trevndorf, da van man di messe vnd daz lieht verriht, den er hat gechauft von sinem Ohaim Jansen von volchenstorf mit allem dem nvtz zeholz vnd ze velde vnd dar zv gehoret versuht vnd vnversuht vnd ob die messe vnd daz lieht indert wurden versavmt, so sol er oder sein bru^eder oder ir erben des vorgenantes hofs so lange vnder winden vntze die savmvnge werde wider tan. Daz disev sach stete vnd vnzerbrochen van vns beleib vnd van vnser bruderschaft, geben wir disen brif ze einem ewigen vrchvnde versigelt mit vnserm Jnsigel vnd mit vnsers Conventz Jnsigel. Diser brif ist gegeben, da van christes gepurde ergangen warn drevzehen hvndert Jar vnd dar nach in dem Vierzgisten Jar an Sand Nyklas tag ze Gersten in dem Chloster.

Source Fulltext: OÖUB 6 (Wien 1872) S. 359f., Nr. 355