ICH Hainreich der Prewhaven und mein hawsfrawe Katrey wir verjehen, daz wir ze chauffen haben geben unsern hof den Tru^echsenhof genant in Syrdnicher pharre gelegen der unser frayes aygen ist Weinmarn dem Tewerwanger purger ze Steyr und seiner hawsfrawn Chunigunden umb anderthalb hundert phunt phenning wyenner munzze, der sew uns gantz und gar gericht und gewert habent. Wa^er aber daz ich obgenanter Hainreich der Prewhaven den selben hof herwider wolt chauffen mit meinem aygenhaften gu^et umb die selben phenning von sand Larentzen tag der nu schierist chumt uber zwai jar, so sullen sew mir der obgenantWeinmar oder sein hawsfrawe denselben hof herwider ze chauffen geben umb die selben phenning. Gescha^eh dez nicht, wanne die zwai jar auscho^ement, so sol der vorgenant hof ir aygenhaft chaufts gu^et sein. Und daz lob wir in alles daz an dem prief geschriben stet sta^et ze halten mit unsern trewn an alles gevaer. Daz die red also furbas sta^et und unverchert beleib, daruber gib ich Hainreich der Prewhaven Weinmarn dem Tewerwanger und seinen erben den prief fu^er mich und alle mein erben zu^e einem waren urchu^ende der warhait versigelten mit meinem anhangunden insigel, und durch pezzer urchu^ende und getzewgnu^ezze willen mit hern Chunrats dez Sa^ezzer und mit Gerungs dez Ra^edler von Sichtenberg meiner swa^eger und mit meins o^echaims hern Chunrats von Flachenekk und mit meins vettern Petreins dez Prewhaven anhangunden insigeln. Der prief ist geben nach Christi gepu^erde uber drewtzehen hundert jar darnach in dem zwai und sechtzgisten jar dez sunntag vor sand Larentzen tag.

Source Fulltext: OÖUB 8 (Wien 1883) S. 97f., Nr. 95