ICH Hertneyd der O^esterberger und mein hawsvrow vrowe Guet wir verjehen, daz wir versatzt haben unsern hof datz dem do^erffe genant in sand Michels pharre gelegen und ain mu^el und ain lechen und ain hofstat und waz darzu geho^ert, daz alles unser vreyes aygen ist, und ain zechent auf dem hof ze Wysenpach in sand Petroer pharre gelegen, und auf allen den hofsteten die in den selben hof geho^erent oder noch gemacht werdent auz dem selben hof wie die genant sind, und der auch lechen ist derselbig zechent von dem pystum ze Pazzaw, mit allen rechten und nutzen alz wir sew ich und mein sweher Jans der Pavzz saelig von alter inne gehabt haben, si sein chlain oder groz, auf dem obgeschriben hof und auch auf dem zechent, ... Weynmarn dem Tewrbanger purger ze Steyr und seiner hawsrrowen vrowen Chu^enigunden und allen seinen erben auz unser nutz und gewer in die iren fu^er zway hundert phunt wienner phenning, der sew uns berait darauf gelihen habent durch unsrer anligender notdu^erft willen, der wir anders nicht verziechen machten und die wir christen und juden ze gelt haben geben fu^er meinen sweher Jansen den Pavzzen von Wysenpach. Ez schol auch umb den obgenanten satz lo^esung sein mit den zwain hundert phunden von weynnachte die nu schierist cho^ement u^eber ain jar. Geschech des nicht, so schullen sew mit dem obgenanten satze allen ieren frumen schaffen mit versetzen mit verchauffen und geben, swem sew wellent, mit uns und aller unsrer erben guetleichem willen und wart an alle unser ierung und widerred. Und wer den prief inne hat oder fu^erpringt ez sein erben oder ir gelter oder wer der ist der in inne hat oder fu^erpringt, dem schol er alz nutz und alz guet sein recht alz in selben, daz lob wir in alles daz stet ze haben daz an dem prief geschriben stet mit unsern trewen an alles gevaer. Daz die red also fu^erbas staet und unverchert beleib, daruber gib ich Hertneid der O^esterberger und ich Guet sein hawsvraw Weynmarn dem Tewrbanger und seiner hawsvrowen vrowen Chunigunden und allen seinen erben den prief fu^er uns und all unser erben zu einem warn u^erchu^end der warheit versigelten mit meinem anhangunden insigel, und durch einer pezzern sicherhait und gezewgnuzz willen mit O^etackers des Wolfstain und mit Pu^erchartzs des Newnburger und mit Jansen des Pawzzen und mit Ulreichs des Pawzzen seines prueder anhangunden insigeln. Der prief ist geben noch Christi gepu^erd u^eber drewzechen hundert jar darnoch in dem zway und sechczgigisten jar an sand Niclas tag.

Source Fulltext: OÖUB 8 (Wien 1883) S. 113f., Nr. 108