ICH Hans der Ponhalm vnd all mein erben wir veriehen vnd tuen chunt offenleich mit dem prief allen den die in sehent oder hoerent Lesen, daz wir mit wolbedachtem muet vnd nach rat vnser pessten vrewnt zder zeit do wir ez wol getuen machten, auz vnserr nucz vnd gewer versaczt haben vnseren lieben vrewnten Gottfriden dem Sinczenperger und Hainreichs chinder des Hager saeligen und Fridreichen dem Aschpekchen und allen iern nagsten erben unser guet daz aigen ist vnd daz genant ist dacz dem Hofaern gelegen in Wolfarer pfarr mit allen den rechten eren und nu^eczen so von allter darzue geho^ert versuech vnd vnuersuecht vmb fu^emf vnd zwainczikch pfunt pfening wienner münzz also mit der weschaidenhait, daz man jaerleichen davon dienen schol zehen schilling pfening wienner münzz, da man Hainreichen dem Hager saeligen seinen Jartag von wegen schol mit zwain gesproch messen vnd mit ainem gesungen ampt vnd mit ainer grazzen vigilig wo sein die nachsten vrewnt miteinander enain hin werdent. wer auch daz an dem vorgenanten zins ich abgieng, daz schol man haben auf den egenanten guet. ez sol auch Losung sein von sand Jörigen tag der schierist chumpt vber zway Jar. Lösen wir dann nicht so schulln sy vns herzue geben siben pfunt wienner pfening und sol ez dann ir gechaufftz guet sein mit allen den rechten als vor verschriben ist. Wir sein auch des vorgenanten guets ir gewer, wo in des nat geschiecht. Naemen sew dar icht schaden den selben schaden schulln sew haben auf anderr vnser hab wo wir di haben. Daz in die red stet vnd vnverchert weleib, darvber gib ich in disen offenn prief mit meinem anhangunden Insigl westetigt, vnd zu einer pezzern sicherhait mit hern Philipps des Ponhalm anhangunden Insigel versigelt, der daz durich vnsern willen an den prief gelaet hat im an schaden. Der prief ist geben do man zalt von Christi gepu^erd drewzehen hundert Jar darnach in dem fu^emf vnd sechczkisten Jar am sunntag vor sand Mathias tag. Wir Niclas von gots gnaden abpt ze Gersten veriehen daz wir der abschrift den rechten prief inne haben; wann sein Gotfriden dem Sinczenperger oder vns uat geschiecht so vintt man dem prief ze Gersten versigelt mit vnserm anhangunden Insigel.

Source Fulltext: OÖUB 8 (Wien 1883) S. 210, Nr. 206