ICH Gotfrid der Sinczenperger vnd . . mein hausfrowe vnd alle vnserr erben wie die genant sein wir verjehenvnd tuen chunt offenleich mit dem brief allen den di in sehent horent oder lesent, daz wir mit wolbedachtem muet vnd redleich dem Erbergen herren hern Erharten zu den czeiten abt ze Gaersten vnd seinem chunftigen Covent ewichleich in geantwurt und gegeben haben iren hof, der si von recht angeho^ert, mit allen den nu^eczen di dar zu gehorent besuecht oder vnbesuecht wie die genant sein, vnd der gelegen ist im Pehaimperger pharr pei der Remnick und genant ist in der aw und da von man dient alle Jaerichleich czway pfunt pfenning Wienner Mu^enzze, ain pfunt phenning an Sand Jorigen tag vnd ain pfunt pfenning an vnsrer vrowen tag zu der dienst zeit unverzogenthleich, vnd von den vorgenanten pfenning sol man alle Jaerichleich geben an irrung dem vorgenanten Covent ze Gaersten vierzehen schilling pfenning Wienner Mu^enzze und dem .. Guster daselbs sechczig pfenning von allen sachen di in angehorent wi di genant sein. Mit solcher beschaidenhait, daz man alle Jaerichleich da von begen sol di hochczeit, di genant ist Transfiguratio mit allen tagczeiten vnd messen als O^ebrist gewonhait ist in dem vorgenanten Gotzhaus. Ich vorgenanter Gotfrid vnd all mein erben veriehen und verhaizzen auch dem vorgenanten Gotzhaus, daz wir zu dem vorgenanten hof chain ansprach fu^erbaz nimmermer gehaben sullen mit chainerlay sachen wie die genant sei, vnd sullen auch fu^er diselben ansprach ir gewer sein nach lantz recht. Daz dem vorgenantem Gotzhaus di red also stet und unverchert beleich, daruber so gib ich in vnd mein erben den brief versigilten mit meinem anhangunden insigil, vnd zu einer pezzern sicherhait vnd zewgnu^ezz versigillten mit der Erbergen anhangunden insigilen di hernach geschriben stent vnd di ich darzu gepeten han in an allen schaden: Mit her Nycla dez Haiden vnd mit Seybotz des Sinczendorfer vnd mit Hansen dez Glewser. Vnd daz ist geschehen do man zalt von Christi gepurd drewzehen hundert Jar vnd darnach in dem vier vnd sechczigisten Jar an der heiligen zwelfpoten tag Sand Symons vnd Judas.

Source Fulltext: OÖUB 8 (Wien 1883) S. 193f., Nr. 190