Wier Nicla von Gots gnaden ahbt des gotshaussz datz Gersten verjehen, daz wier wolbedacht nach erberer lawt rat und beweisung ain drittail aus zwain jeuchen des weingarten gelegen in dem churtzen Taillant daz Chunrat der Chamere seliger hat geschafft und geben zu sand Johannschirichen ze Ga^ersten, haben ze leibgeding hinlazzen der zwain leiben Hermannen dem Gusen und Elispeten seiner hausfrawn zu ier paider ta^egen in solher maynung, daz si zu der selben chirichen davon jerleich alle di weil und si lebent schullen geben und unserm hofmaister antwurtten aus dem grant pei unsrer prezz in dem hof ze Chrems den dritten emer mozst an gever alz er in dem selben drittail wegchst, und zwelif wienner phenning ze purchrecht an sand Michels tag alz purchrechts recht ist in dem lande ze Oesterreich. Si schullen auch daz selb drittail pawn zu aller arbaitt der ez bedarf wi so di genant ist so si pezst mu^egen und mit willen nichtz vertziehen. Taeten si des nicht und mo^echt man daz selbe beweisen mit zwain erbern umbsetzen daselbs den ez chunt und gewizzen wer, so habent si all ier recht daran verloren. Wir offen auch, wann di vorgenanten zwen leib paid abgent mit dem tod und nicht mer sind, so ist daz obgenant drittail wider ein vreys und lediges aygen zu der obgenanten sand Johannschirichen alz si vor gewesen ist, daz all ier erben di si hinder in lazzent dhainerlay ansprach darauf nicht mer schu^ellen noch mu^egen gehaben in dhainen wegen. Daz di handlung also beleib staet und unverchert, des geben wir zu ainem urchu^end der worhait den prief mit unserm anhangunden insigel versigelt. Der prief ist geben nach Christes gepu^erd uber dreutzehenhundert jar und in dem fu^emf und sechtzkistem jar an des heiligen chreutz tag in dem heribst.

Source Fulltext: OÖUB 8 (Wien 1883) S. 246f., Nr. 245