ICH Trostel der Jud von Chrems Stroylleins sun von Lintz, mein hawswrow und unser erben wir vergechen, daz wir verchawft haben unsern weingarten, der gelegen ist ze Wesendorff und hayst der Greyner und daz Gugel dapey, und ist daz geschechen mit percherren hant des erbern Chunratz des Flander ze Wesendorf dem man jaerlichen dovon geit ze purchrecht von dem egenanten weingarten zweliff winer phening an sand Michels tag, und von dem Gugelein zwen winer phening auch ze purchrecht an sand Michels tag in der Goestner hoff ze Wesendorff. Den vorgenanten unsern weingarten hab wir recht und redlich verchawft und gegeben mit alle den nutzen und rechten di darzue geho^erent und sam wir in in purchrechtes gewer herpracht haben umb fu^emf und viertzig phunt winer phening der wir gar und gantz verricht und gewert sein ze rechten taegen dem erbern Seydlein dem Gesoler ze Wesendorff seiner hawswrow und ieren erben furbaz ledichleichen und vreylichen ze haben und allen ieren frumen damit schaffen. Und daz der chawff fu^erbaz also staet und unzebrochen beleib, des geb wir den offen prief versigelt mit der erbern laewt anhangunden insigel des obgenanten Chunratz des Flander und hern Niclas von Wytra di zeit judenrichter ze Chrems. Der prieff ist geben nach Christi gepurd drewtzechen hundert jar darnach in dem sechs und sechtzkistem jar an sand Georgen tag.

Source Fulltext: OÖUB 8 (Wien 1883) S. 273f., Nr. 277